دیمهنێكی ده‌روازه‌ى نێت پێش ئه‌وه‌ى بهفهرمى بكرێتهوه... فۆتۆ: ئیدارهى سۆران
"ژماره‌یه‌كی زۆرى لێیه"
شوێنه مه‌ترسیداره‌كانى ده‌روازه‌ى (زێت) له مین و ته‌قه‌مه‌نى پاكده‌كرێته‌وه
964+
فه‌رهاد حه‌سه‌ن
ده‌زگاى مینى هه‌رێم رووى له ده‌روازه‌یه‌كى نێوده‌وڵه‌تى كردووه بۆ ئه‌وه‌ى شوێنه مه‌ترسیداره‌كانى له‌و مین و ته‌قەمه‌نیانه پاكبكاته‌وه كه له رابردوودا كاتى جیاواز لێی چێندراون.
ده‌روازه‌ى زێتێ له سنوورى قه‌زاى سیده‌كان له 10.5.2023 به فه‌رمى كراوه‌ته‌وه و خاڵێكی دیكه‌ى سنوورییه كه هه‌رێمی كوردستان به وڵاتى توركیا ده‌به‌ستێته‌وه.
عه‌لى عه‌بدولڕه‌حمان، به‌ڕێوه‌به‌رى گشتى كاروبارى مینى هه‌ولێر به 964ـى راگه‌یاند، پاككردنه‌وه‌ى شوێنه مه‌ترسیداره‌كانى ئه‌م ده‌روازه‌یە له پلانیاندایه و دواى جه‌ژنى قوربان ده‌ست به پاككردنه‌وه‌ى ده‌كه‌ن.
وتیشی “تیمى تایبه‌تى رووپێوی سه‌ردانى سنووره‌كه‌یان كردووه و شوێنه مه‌ترسیداره‌كانیان ده‌ستنیشان كردووه”.
به‌قسه‌ى عه‌لى عه‌بدولڕه‌حمان، ئه‌و مین و ته‌قه‌مه‌نیانه‌ى له سنوورى ئه‌م ده‌روازه‌یه هه‌ن به‌شێكیان بۆ دواى راپه‌ڕین ده‌گه‌ڕێته‌وه كه تیایدا هه‌ردوو لایه‌نى ده‌وڵه‌تى توركیا و په‌كه‌كه به‌رده‌وام شه‌ڕیان له‌و سنووره هه‌بووه و سه‌دان مین و ته‌قه‌مه‌نیان چاندووه، به‌شێكی دیكه‌شیان بۆ سه‌رده‌مى شه‌ڕی هه‌شت ساڵه‌ى عێراق – ئێران ده‌گه‌ڕێته‌وه.
ئاماژه‌ى به‌وه‌شكرد، به‌پێی هه‌ڵسه‌نگاندنه‌كانى تیمى رووپێوی، پێشبینى ده‌كرێت ژماره‌یه‌كی زۆرى مین و ته‌قه‌مه‌نى له سنوورى ئه‌م ده‌روازه نێوده‌وڵه‌تییه هه‌بێت.
