وەزیرى نەوتى عێراق
“لێکتێگەیشتنى باش هەیە بۆ دەستپێکردنەوەى هەناردەى نەوتى هەرێم”
964+
وریا فەتاح
وەزیرى نەوتى عێراق رایگەیاند، لەگەڵ تورکیا لە دانوستاندان بۆ دەستپێکردنەوەی هەناردەی نەوت لە رێى بەندەرى جەیهانەوە و لەگەڵ هەرێمیش بەرەوپێشچوونى باش هەیە لە بارەى بۆرى نەوتى عێراقى تورکى.
حەیان عەبدولغەنی، وەزیری نەوتی عێراق رایگەیاند، عێراق رۆژانە چوار ملیۆن بەرمیل نەوت و 21 ملیۆن لیتر بەنزین بەرهەم دەهێنێت، بە پاڵپشتى 50%ـى نرخى بەنزین توانیومانە پێداویستییەکانى ناوخۆ بۆ بەنزین نزیک بکەینەوە لە پێداویستى ناوخۆ.
دەشڵێت، لە عێراقدا رۆژانە 28 ملیۆن لیتر بەنزین دەسوتێنرێ و 21 ملیۆن لیتر بەرهەمدەهێنرێت، بەڵام ئەو حەوت ملیۆن لیتر جیاوازیی هەیە و لە مساڵدا دەگەینە قۆناغى دابینکردنى پێداویستى ناوخۆ.
لەبارەى بەرهەمهێنانى غازەوە وەزیرى نەوت دەڵێت، رێژەى بەرهەمهێنانی غاز بۆ 63% بەرزبووەتەوە، بەشێوەیەک بڕی غازی بەرهەمهێنراو گەیشتووەتە 1.9 ملیار پێ سێجا، لەو رێژەیە رۆژانە هەزار پێ سێجا لەناوخۆدا دەسوتێنرێت.
“لەگەڵ تورکیا بەردەوامین لە گفتوگۆ و دانوستانەکانمان بۆ دەستپێکردنەوەى هەناردەى نەوت لە رێگەى بەندەرى جەیهانەوە، لەگەڵ هەرێمى کوردستانیش پێشکەوتنى باش لە دانوستانەکان هەیە لەبارەى بۆرى نەوتى عێراقى تورکى”، وەزیرى نەوتى عێراق واى وت.