لە سلێمانی
ماتۆڕسوارێک خۆی بە ئۆتۆمبێلێک دەکێشێت و شۆفێرەکەشی بە چەقۆ بریندار دەکات
964+
ئەحمەد محەمەد _ سلێمانی
درەنگانی شەوی رابردوو لە فولکەی گەڕەکی قوولەرەیسی لە شاری سلێمانی ماتۆڕسکیلێک خۆی بە ئۆتۆمبێلێک دەکێشێت و دواتر شۆفێرەکەشی بە چەقۆ بریندار دەکات.
بەپێی وتەی شایەتحاڵەكان، کە قسەیان بۆ 964 کردووە، ماتۆڕسكیلەكە دوای ئەوەی خۆی كێشاوە بە ئۆتۆمبێلی نیسان سێنتراكە، ماتۆڕسوارەكە دابەزیوە و دەمەقاڵێ دروست بووە، لە ئەنجامدا چەقۆیەكی داوە لە گورچیلەی شۆفێرەكە.
سامان نادر، بەڕێوەبەری سەنتەری فریاكەوتنی خێرای سلێمانی بە 964ـی وت، “كاتژمێر 11:32 خولەكی شەوی رابردوو لە فولكەی قولەرەیسی كەسێك بە چەقۆ بریندار بووە، پەیوەندیمان پێوەكراوە و تیمەكانمان چوونەتە سەر رووداوەكە”.
وتیشی، “بریندارەكە تەمەنی 32 ساڵ بووە، دوای ئەوەی فریاگوزاریی سەرەتایی بۆ کراوە، دواتر بۆ دڵنیابوونی تەندروستی رەوانەی نەخۆشخانەی شار كراوە و تەندروستیی بریندارەكە جێگیر بووە.
پێداچوونەوە: پێشەوا محەمەد
