500هەلی كار بۆ دەرچوانی زانكۆ و پەیمانگاكان راگەیەنرا

964+

ئەحمەد محەمەد – سلێمانی

ئەمڕۆ لە پەیمانگای “برایت”ی ئەهلی و پیشەیی لە سلێمانی بە بەشداری سەنتەری هەلی كاری هەشت زانكۆ و پەیمانگای هەرێمی كوردستان و 35 بۆ 40 كۆمپانیای گەورەو مامناوەندو بچوك، هەلیكار بۆ فێرخوازانی زانكۆ و پەیمانگاكانی سنووری پارێزگای سلێمانی  راگەیەنراو ، راگری پەیمانگاكەش دەڵێت، 500 هەلی كارمان بۆ دەرچوانی زانكۆ و پەیمانگاكان رەخساندووە.

د.جەوهەر جەلال راگری پەیمانگای برایت و خاوەنی پرۆژەكە بە 964ـی وت، “ئەمە یەكەمین جارە لەئاستی ناوەندێكی خوێندنی باڵادا ، پێشانگایەكی لەو جۆرە بكرێتەوە.

وتیشی ، دەمانەوێت فێرخوازانی پەیمانگاكەمان لە دوای دەرچونیان، بتوانن لەبازاڕی كاردا ئیشوكاری خۆیان بدۆزنەوە هەروەها پەیوەندی راستەوخۆیان هەبێت لەگەڵ بازاڕ، كۆمپانیا و دامەزراوە گەورەكانمان هێناوەتە پەیمانگاكەمان بۆ ئەوەی دەرفەتی كاری خۆیان بۆ دەرچوانی یەیمانگاكەی ئێمە و تەواوی دەرچوانی هەرێمی كوردستان بخەنەڕوو.

“لەپێشانگاكەدا 500 هەلیكاری تێدا رەخسێندراوە، بەچوار شێوازی خۆبەخش، مەندوب، ساڵانە و هەمیشەیشی تێدایە، لەسەرەتادا بۆ چەند مانگێك بەخۆبەش و دواتر كەسی وەرگیراویان بەدڵ بێت بەهەمیشەیی دەبێتە كارمەندی كۆمپانیاكە” جەوهەر جەلال وای بە 964وت .

پەیمانگای تەكنیكی و پیشەیی برایت ، پەیمانگایەكی ئەهلیەو یەكەمین ناوەندی ئەكادیمی تەكنیكی و پیشەییە لەسنووری پارێزگای سلێمانی و سەر بەوەزارەتی خوێندنی باڵایە.

پێداچوونەوە: توانا نەقی