دیمەنی یاریگای فەرەنسۆ هەریری لە هەولێر.گرافیک 964
نۆژەن دەکرێتەوە
نزیکەی دوو ملیار دینار بۆ یاریگای فەرەنسۆ هەریری تەرخان کرا
964+
توانا نەقی
دواجار بێنازی یاریگای فەرەنسۆ هەریری لە هەولێر خەریکە دەڕەوێتەوە و رەزامەندى درا بە تەرخانکردن و خەرجکردنى نزیکەی دووملیار دینار بۆ نۆژەنکردنەوە و گۆڕینی چیمەنەکەی.
ئێوارەی ئەمڕۆ شەممە پەیجی فەرمی یانەی هەولێر بڵاویکردەوە، بە فەرمانی سەرۆکی حكومەت بڕی زیاتر لە ملیارێک و 761 ملیۆن و 716 هەزار دینار بۆ نۆژەنکردنەوەی یاریگای فەرەنسۆ هەریری تەرخان کراوە.
دەشڵێت، دواى کۆتاییهاتنى خولى نایابى عێراقى ئەمساڵ راستەوخۆ دەست بە جێبەجێکردنى پڕۆژەکە دەکرێت کە خۆی لە گۆڕینی چیمەن و نۆژەنکردنەوەی یاریگاکە دەبینێتەوە
یاریگای “شەهید فەڕەنسۆ ھەریری” یاریگایەکی نێودەوڵەتی یانەی ھەولێرە و بەدووەم گەورەترین یاریگای وەرزشی دادەنرێت لە عێراق، لە ساڵی 1956 لەگەڵ دروستبوونی یانەی ھەولێر دروستکراوە و لە کۆتای ساڵی 2001 بەناوى “فەڕەنسۆ ھەریری” کراوە، لە ساڵی 2009 بووەتە یاریگایەکی نێودەوڵەت.
تەرخانکردنی ئەو بڕە پارەیە بۆ نۆژەنکردنەوەی یاریگاکە دوای ئەو کێشە کارگێڕیانە دێت کە ماوەیەکە یەخەی یانەکەی گرتووە و دواجار بە دەست لەکارکێشانەوەی سەرۆک و جێگرەکانی یانەکە کۆتایی هات و دەستەیەکی نوێی کارگێڕی شوێنی گرتنەوە.
