کۆڵبەرەکانی سەر سنوور. فۆتۆ ئاژانسی ئانادۆڵو.
رۆژهەڵاتی کوردستان.. 2022 بۆ کۆڵبەرەکان ساڵێکی باش نەبوو
964+
هاوبەش ئەبوبەکر – سلێمانی
لە ساڵی 2022ـدا زیاتر لە 290 کۆڵبەر و کاسبکاری کورد لە سنوورەکانی رۆژھەڵاتی کوردستان بوونەتە قوربانی، بەراورد بە ساڵی 2021 ژمارەی قوربانییان 35٪ زیادی کردووە.
رێکخراوی ھەنگاو بۆ مافەکانی مرۆڤ رۆژی دووشەممە 16ی کانونی دووەم رایگەیاند، لە ساڵی رابردوودا 46 کۆڵبەر و کاسبکاری کورد لە سنوورەکان گیانیان لەدەستداوە و کوژراون، 244ی دیکەش برینداربوون.
لەکۆی 290 گیانلەدەستدان و برینداربوون، 209 کۆڵبەر و کاسبکاری کورد بە تەقەی راستەوخۆی ھێزە ئەمنییەکان بوونەتە قوربانی، 35ی دیکەش بە رووداوی سروشتی وەک ھەڵدێران، خنکان و ھەرەسی بەفر بریندار بوون و گیانیان لەدەستداوە.
بە پێی ئامارەکەی رێکخراوی ھەنگاو، زۆرترین کۆڵبەر و کاسبکار لە پارێزگای کرماشان بوونەتە قوربانی، کە 162 کەس بوون، دواتریش پارێزگای سنە 108 کەس و ورمێ ٢٠ کەس.
منداڵانی خوار تەمەن 18 ساڵیش لەنێو قوربانییەکاندا بوون، رێکخراوەکە لە ساڵی رابردوودا 11 منداڵی کۆڵبەر کە تەمەنیان لە خوار 17 ساڵ بووە، بوونەتە قوربانی.
“چوار منداڵی کۆڵبەر بە تەقەی هێزە چەکدارەکانی ئێران، دوو کۆڵبەر بەهۆی لێدان لەلایەن ئەو هێزانەوە، کۆڵبەرێک بەهۆی تەقینەوەی مین، سێ کۆڵبەر بە هۆی ئاگرکەوتنەوە و کۆڵبەرێکیش بە هۆی هەرەسی بەفر بوونەتە قوربانی،” رێکخراوەکە وا دەڵێت.
بەراورد بە ساڵی 2021، ژمارەی گیانلەدەستدان و برینداربوون کۆڵبەر 35٪ زیادی کردووە و لە 75 حاڵەتەوە بەرزبووەتەوە بۆ 290 حاڵەت لە ساڵی 2022ـدا.