یارییەکی پێشووی کلاسیکۆ لە نێوان ریال مەدرید و بارسێلۆنا...فۆتۆ: EFE
هه‌وادارانی وه‌رزشی چاوه‌ڕێی كلاسیكۆ ده‌كه‌ن
964+
ئه‌رسه‌لان عه‌بدوڵڵا – هه‌ولێر
دوای گه‌یشتنی یانه‌ی ریال مه‌درید به یاریی كۆتایی جامی سوپه‌ری ئیسپانیا، هه‌وادارانی وه‌رزشی له سه‌رانسه‌ری دنیا چاوه‌ڕێی كلاسیكۆی سوپه‌ر ده‌كه‌ن.
ئه‌مشه‌و “پێنجشه‌ممه 12ـی كانوونی دووه‌م” له دووه‌م یاریی پێش كۆتایی جامی سوپه‌ری ئیسپانیا، له نێوان هه‌ردوو یانه‌ی ریال بێتیس و بارسێلۆنا به‌ڕێوه ده‌چێت.
یارییه‌كه كاتژمێر 22:00 به كاتی كوردستان له یاریگه‌ی شا فه‌هد له ریازی پایته‌ختی سعوودیه ده‌ستپێده‌كات.
براوه‌ی یارییه‌كه ده‌چێته یاریی كۆتایی پاڵه‌وانیه‌تییه‌كه، له‌وێشدا رووبه‌ڕووی یانه‌ی ریال مه‌درید ده‌بێته‌وه.
یانه‌ی ریال مه‌درید شه‌وی رابردوو به لێدانه‌كانی یه‌كلاكه‌ره‌وه به 4-3 گۆڵ له یانه‌ی ڤالێنسیای برده‌وه، دوای ئه‌وه‌ی له كاتی ئاسایی و زیادكراودا به 1-1 گۆڵ یه‌كسان بوون.
ریال مه‌درید گه‌یشتووه‌ته یاریی كۆتایی و جه‌ماوه‌ری وه‌رزشییش چاوه‌ڕێ ده‌كه‌ن ئه‌مشه‌و بارسێلۆنا بردنه‌وه تۆمار بكات، بۆ ئه‌وه‌ی له یاریی كۆتاییدا رووبه‌ڕووی ریال مه‌درید ببێته‌وه و هه‌وادارانی وه‌رزشی ده‌یانه‌وێت كلاسیكۆیه‌كی نوێی نێوان هه‌ردوو یانه ببینن.
جامی سوپه‌ری ئیسپانیا له‌وه‌ته‌ی 1982ـه‌وه له نێوان پاڵه‌وانی خول و پاڵه‌وانی جامی شای ئیسپانیا دێته ئه‌نجامدان، كه هه‌موو ساڵێك پێش ده‌ستپێكردنی وه‌رزی نوێ یه‌ك یاری ده‌كرا، به‌ڵام له 2018 سیستمی جامه‌كه گۆڕا و چوار تیپ تێیدا به‌شدارده‌بن و له ناوه‌ڕاستی وه‌رزدا ده‌كرێت، هاوكات بۆ بره‌وپێدانی بازرگانی تۆپی پێی ئیسپانیا، دوو ساڵه ركابه‌رییه‌كان له سعودیه ده‌كرێت.