دیمەنی عەلی خامنەیی لە کاتی دەنگدان.وێنە.ئاژانسی فەرمی ئێران
زیاتر لە 61 ملیۆن کەس دەنگ دەدات
هەڵبژاردنی پەرلەمانی ئێران دەستیپێکرد
964+
توانا نەقی
لەسەرجەم پارێزگاکانی ئێران و بە رۆژهەڵاتی کوردستانیشەوە پرۆسەی دەنگدان بۆ خولی دوانزەهەمینی پەرلەمان و خولی شەشەمی ئەنجومەنی سەرکردایەتیی شارەزایان دەستیپێکردووە.
ئاژانسی فەرمی میهری ئێران ئەمڕۆ هەینی 1.3.2024 بڵاویکردەوە، ئەحمەد واحیدی وەزیری ناوخۆی ئێران رایگەیاندوە، هەڵبژاردنەکان لە کاتژمێر 8:00ـی بەیانی ئەمڕۆ هەینیەوە لە 59 هەزار بنکەی دەنگدان لە سەرانسەری وڵات بەڕێوەدەچێت.
موحسین ئیسلامی، وتەبێژی فەرمی بارەگای هەڵبژاردنەکانی وڵاتی ئێران دەڵێت، ئەو کەسانەی لە 21ی ئازاری 2006 لەدایکبوون، لە ئێستاوە مافی دەنگدانیان هەیە لە هەڵبژاردنەکانی ئەمساڵدا.
ئاماژەی بەوەشکردووە، 61 ملیۆن و 172 هەزار و 298 کەس مافی دەنگدانیان هەیە، 30 ملیۆن و 945 هەزار و 133 پیاو و 30 ملیۆن و 227 هەزار و 165 ژن.
ئەنجومەنی شارەزایانی ئێران لە 88 کورسی پێکدێت و 144 کاندید کێبڕکێ بۆ بەدستهێنانی ئەو کورسیانە دەکەن.
پەرلەمانی ئێران کە لە 290 کورسی پێکدێت 15 هەزار و 200 کاندید لە 31 پارێزگاوە کێبرکێ دەکەن و لە 12%ـەی کاندیدەکان ژنن.
