دیمهنێكی رشاندن لهههولێر كه بهڕێوهبهرایهتى پارك و باخچهكان بڵاویكردووهتهوه.
"وه‌زاره‌تى كشتوكاڵ خۆى قڕكه‌ر دابه‌ش ده‌كات"
رشاندن به مادده‌ى قڕكه‌ر ساڵانه 30% هه‌نگه‌كانى هه‌رێم له‌ناو ده‌بات
964+
فه‌رهاد حه‌سه‌ن
رێكخراوى هه‌نگه‌وانانى كوردستان بۆ 964 ئاشكراى ده‌كات، ساڵانه به‌هۆى رشاندنى گیا و دره‌خته‌كانەوە 30% هه‌نگى هه‌رێمی كوردستان له‌ناوده‌چن.
ئێستا له هه‌رێمی كوردستاندا وه‌رزى رشاندنه به مادده‌ى قڕكه‌ر، ئه‌و ماده‌یه‌ى بۆ رشاندن به‌كارده‌هێندرێت كیمیاییه.
ئه‌حمه‌د پشده‌رى، سه‌رۆكى رێكخراوى هه‌نگه‌وانان به 964ـى وت، ئه‌و مادده قڕكه‌ره‌ى رشاندنى پێده‌كرێت، كاریگه‌رى خراپی له‌سه‌ر هه‌نگه‌كان هه‌یه و به‌شێكیان له‌ناو ده‌بات.
وتیشی “پێویسته ئه‌و شوێنه‌ى رشاندنى بۆ ده‌كرێت، لانیكه‌م دوو كیلۆمه‌تر له هه‌نگه‌كانه‌وه دوور بێت”.
ئاماژه‌ى به‌وه‌ش كرد، له حاڵێكدا ئه‌گه‌ر دواى رشاندنه‌كه باران ببارێت، ئه‌و كاریگه‌رییه زۆره‌ى له‌سه‌ر هه‌نگه‌كان نامێنێت، به‌ڵام كه‌مترین كات له دواى رشاندنه‌كانه‌وه باران باریوه.
پشده‌رى، ئاشكراى ده‌كات چه‌ندینجار داوایان له وه‌زاره‌تى كشتوكاڵ كردووه رێنمایی تایبه‌ت به‌و رشاندنه بڵاوبكاته‌وه، به‌ڵام ده‌ڵێت “تائێستا هه‌ر قسه بووه و نه‌بووه‌ته كردار، ته‌نانه‌ت وه‌زاره‌ت خۆى ئه‌و مادده قڕكه‌ره به‌سه‌ر جوتیاراندا دابه‌ش ده‌كات”.
سه‌رۆكى ئه‌م كۆمه‌ڵه‌یه روونیده‌كاته‌وه، جوتیاران ده‌توانن مادده‌ى سروشتى له جیاتى مادده‌ى كیمیایی بۆ رشاندن به‌كار بهێنن، هه‌م كاریگه‌رى له‌سه‌ر هه‌نگه‌كان نابێت و هه‌میش له‌رووه ئابوورییه‌كه‌ى به‌نرخێكی هه‌رزان بۆیان ده‌وه‌ستێت.
باس له‌وه‌ده‌كات له‌ناوچوونى 30%ـێ هه‌نگه‌كان له هه‌رێمی كوردستان، ده‌بێته هۆى له‌ناوچوونى 30% به‌رهه‌مى ساڵانه‌ى هه‌نگ.
به پێی ئه‌و ئاماره‌ى كۆمه‌ڵه‌ى ناوبراو به 964ـى داوه، ساڵى پار به‌هۆى گۆڕانى که‌شوهه‌واوه به‌رهه‌مى هه‌نگ له هه‌رێمی كوردستان كه‌مبووه، كه 500 تۆن بووه، به‌ڵام ساڵانى پێشووتر به‌رهه‌مه‌كه‌یان باشتر بووه.
