ماڵی بە هەزار دینار
لە بری شارەوانی چەند ماتۆڕێک زبڵی ماڵەکانی پیرەمەگرون کۆدەکەنەوە
964+
بەرزان عوسمان- پیرەمەگروون
بەهۆی کارنەکردنی کۆمپانیای پاککەرەوەی زبڵ و خاشاک هاوڵاتیانی ناحیەی پیرەمەگروون هەراسان بوون و ئێستا لەبری ئەوان چەند کەسێک زبڵی هەرماڵێک بە هەزار دینار فڕێدەدەن.
شۆفێری ماتۆڕێکی سێ تایە کە زبڵی هاوڵاتیان فڕێدەدات بۆ 964 وتی، سێ رۆژە ئەو کارە دەکەن و بۆ هەر ماڵێک هەزار دینار وەردەگرن رۆژانە تا نزیکەی 20 هەزار دینار پەیدا دەکەن.
وتیشی، شارەوانی شوێنی بۆ دیاریکردوون و ئەوانیش ئەو زبڵ و خاشاکەی کۆیدەکەنەوە دەیبەنە ئەو شوێنە.
هاولاتییەکی پیرەمەگرونیش دەڵێت، ماوەی 11 رۆژە کۆمپانیا زبڵی گەڕەکەکەیانی فڕێنەداوە و ئێستا دەبێت هەزار دینار بدەن بەو ماتۆڕانە تاوەکو فڕێیبدەن ئەوەش بارگرانی بۆ دروستکردوون.
پێداچوونەوە: توانا نەقی
