فەرمانگەی ژینگەی سۆران - وێنە: پەیجی فەرمانگەکە لە فەیسبووک
61 فەرمانبەری پێویستە
ساڵێک و پێنج مانگە فەرمانگەی ژینگەی سۆران تەنیا بەڕێوەبەری هەیە
964+
پێشەوا محەمەد
لە مانگی نۆی ساڵی 2022ـەوە فەرمانگەی ژینگەی سۆران فەرمانی دامەزراندنی هەیە، بەڵام تا ئێستا تەنیا بەڕێوەبەری هەیە.
بەڕێوەبەرەکە داوای دامەزراندنی 61 فەرمانبەر و کڕینی ئۆتۆمبێل بۆ فەرمانگەکە و دابینکردنی نەسریەی کردووە، بەڵام تا ئێستا هیچیان نەکراون.
هەژار ماهیر، بەڕێوەبەری فەرمانگەی ژینگەی سۆران بە 964ـی راگەیاند، نازانن بۆچی فەرمانبەریان بۆ دانامەزرێنن، چونکە سنوورەکەیان زۆر چالاکیی ژینگەیی تێدایە و شوێنێکی گەشتیاریشە.
بۆ دامەزراندن لەو فەرمانگەیە ساڵێک زیاترە بە ئۆنلاین لە ئیدارەی سەربەخۆی سۆران فۆڕم پڕکراوەتەوە.
“من هەر خۆم و بینایەکەین و واش چالاکیی ئەنجام دەدەین، ساڵی رابردوو چەندان چالاکیی جۆراوجۆرمان هەبووە و 18 پڕۆژەشم بۆ مۆڵەت ناردووەتە هەولێر”، ئەوەش قسەی هەژار ماهیرە.
هاوڵاتیانی ئیدارەکە ئەگەر بێت و هەر کارێکیان لەو فەرمانگەیە هەبێت، دەبێت بچنە فەرمانگەی ژینگەی هەولێر.
هەژار ماهیر وتیشی، “ئێمە شەش قەزای دیکەشمان لەسەرە، ئەگەر فەرمانگەکە فەرمانبەرەکانی بۆ دابمەزرێندرێت، ئەوا کارئاسانیی زۆر بۆ کاروباری هاوڵاتیان و پڕۆژەکان دەکرێت و پێویست ناکات بچنە هەولێر”.
