بەڕێوەبەرایەتیی تەندروستی کۆیە - پەیجی بەڕێوەبەرایەتییەکە لە فەیسبووک
بۆ یەکەم کوتانە
لەمەودوا تەندروستیی کۆیە دوو رۆژ کوتان ئەنجام دەدات
964+
پێشەوا محەمەد
تەندروستی کۆیە هاوڵاتیان ئاگادار دەکاتەوە لەمەودوا تەنیا دوو رۆژ کوتان بۆ منداڵانی تازە لەدایکبوو دەکات، ئەوانیش رۆژانی یەکشەممە و چوارشەممەیە.
دیاریکردنی ئەو دوو رۆژە تەنیا بۆ ئەو منداڵانەیە کە یەکەم کوتانیان هەیە و کوتانەکانی دیکە بەپێی ئەو کاتەی بۆیان دیاری دەکرێت ئەنجام دەدرێن.
هاوکار عەلی، وتەبێژی تەندروستیی کۆیە بە 964ـی راگەیاند، بڕیارەکە لەبەر ئەوە درا کە رۆژانە منداڵی کەم دەهێندرێن بۆ کوتان و دیاریکردنی ئەو دوو رۆژە بۆ ئەوەیە لانیکەم پێنج بۆ حەوت منداڵ یەکەم کوتانیان بۆ بکرێت.
وتیشی، “ئەو قەترەیەی کوتانەکەی پێدەکرێت لە بەغداوە دەهێندرێت و نرخەکەی زۆر گرانە، هەر شوشەیەکیش بەشی شەش تا حەوت منداڵی تێدایە و ئەگەر بەکارنەهێندرێت بەسەردەچێت، بۆیە رۆژ هەبووە شوشەیەک بۆ دوو منداڵ هەڵپچڕاوە و ئەوەی دیکەی فڕێدراوە”.
پێشتر تەندروستی کۆیە هەڵمەتێکی 10 رۆژەی بۆ تەواوی کۆڵان و گوندەکانی سنوورەکەیان دەستپێکرد بۆ کوتانی ئەو منداڵانەی بە هەر هۆکارێک بێت کوتانەکانیان دواکەوتووە.
“بەو شێوەیە رێگە لە بەفیڕۆچوونی ئەو قەترەیە دەگرین و هیچی خەسار نابێت و لەو دوو رۆژەدا منداڵە تازە لەدایکبووەکان یەکەم کوتانیان بۆ دەکەین”، ئەوەش قسەی هاوکار عەلییە.
