وەزارەتی بازرگانی عێراق داوا دەکات لە هەرێمەوە هێلکەیان بۆ هەناردە بکرێت

964+

ژووری هەواڵ

وەزارەتی بازرگانی عێراق داوا دەکات لەهەرێمی کوردستانەوە هێلکەیان بۆ هەناردە بکرێت، پێشنیاری بۆ وەزارەتی کشتوکاڵ و بازرگانی خۆمان کردووە میکانیزمێک بۆ هەناردەکردنەکەی بدۆزنەوە.

لەبارەی پێشنیارەکەی وەزارەتی بازرگانی عێراق، رۆژی یەکشەممە 14.1.2024، هەردوو وەزارەتی بازرگانی و کشتوکاڵی هەرێم لەگەڵ خاوەنی پرۆژەکانی بەرهەمهێنانی هێلکە کۆبوونەوە و رایانگەیاند، لیژنەیەکی هاوبەش پێکدەهێنرێت بۆ هەناردەکردنی هێلکەی پێویست بۆ باشوور و ناوەڕاستی عێراق.

ئەمڕۆ دووشەممە 15.1.2024، مستەفا عەبدولرەحمان، سەرۆکی یەکێتی هەناردەکارانی هەرێمی کوردستان بە 964ـی راگەیاند، ئاگاداری ئەو پێشنیارە هەن و چاوەڕواندەکرێت هێلکەی هەرێمی کوردستان بۆ عێراق و بەشێک لە وڵاتانی کەنداویش هەناردە بکرێت.

وەزارەتی کشتوکاڵی هەرێم دەڵێت، بەدواداچوون دەکرێت بۆ بڕی بەرهەمهێنان و پێویستییەکانی بازاڕی ناوخۆ و بەرژەوەندی سودی گشتیی هاوڵاتیان لەبەرچاودەگیرێت ، ئینجا بڕیار لەسەر هەناردەکردن یان نەکردنی هێلکە دەدرێت.

لە هەرێمی کوردستان 33 پڕۆژەی بەرهەمهێنانی هێلکە هەن، 15 پرۆژەیان لە سنووری پارێزگای هەولێرن، 11 پڕۆژە لە سلێمانی، پێنج پڕۆژە لە دهۆک و دوو پڕۆژەش لە گەرمیانن.

بەگوێرەی ئامارەکانی وەزارەتی کشتوکاڵ و سەرچاوەکانی ئاوی هەرێم، لە ساڵی 2022 بەرهەمهێنانی هێلکە لە هەرێمی کوردستان بەرێژەی 50٪ لە پێداویستی ناوخۆ زیاتر بووە و بڕی هەناردە گەیشتووەتە زیاتر لە 919 ملیۆن هێلکە.

لە زاخۆ هێلکەی بەرهەمی ناوخۆ گران بووە