پەروێزخان، یەکێک لە دەروازە سنوورییەکانی هەرێم لەگەڵ ئێران - وێنە: 964
دوای حەوت رۆژ
ئاڵوگۆڕی بازرگانی لە مەرزی پەروێزخان دەستیپێکردەوە
964+
میلاد جەلال-گەرمیان
دواى حەوت رۆژ لە مانگرتى شۆفێرانى بارهەڵگر، ئەمڕۆ یەکشەممە، ئاڵوگۆڕى بازرگانى لەمەرزى پەروێزخانەوە دەستیپێکردەوە.
شۆفێرانی بارھەڵگر لە مەرزی پەروێزخان، ماوەی حەوت رۆژ بەھۆی بڕیارێکی وڵاتی ئێرانەوە، مانیان گرتبوو و جوڵەی بازرگانی لە مەرزەکە بەتەواوی پەکی کەوتبوو.
مانگرتنەکە لەوەوە سەرچاوەى گرتبوو، وڵاتی ئێران بڕیاری دابوو ھەر ئۆتۆمبێلێکی بارھەڵگر کە دەڕواتە وڵاتەکەیانەوە، دەبێت 100 لیتر گازیان پێبێت و لەکاتی گەڕانەوەش ھەر لە وڵاتی ئێران ئۆتۆمبێلەکانیان پڕ گاز بکەن.
عەباس ئیسماعیل، سەرپەرشتیاری مەرزی نێودەوڵەتی پەروێزخان بە 964ى وت،”لە کاتژمێر 1:00ی نیوەڕۆی ئەمڕۆ یەکشەممەوە، ئاڵوگۆڕی بازرگانی لە مەرزی پەروێزخان دەستیپێکرۆتەوە”
ئاماژەی بەوەشکرد، دوای کۆبونەوە لەگەڵ بەرپرسانی مەرزەکە لە دیوی ئێرانەوە، بڕیاریاندا کە بڕیارەکەیان بەشێوەیەکی کاتی رابگرن و جوڵەی بازرگانی دەستپێبکاتەوە، تائەوکاتەی بەتەواوی چارەسەر دەکرێت.
پێداچوونەوە- وریا فەتاح