ئامارەکان هەڵکشاون
ساڵی پار 53 کرێکار لە هەرێم گیانیانلەدەستداوە
964+
شـیراز عەبدوڵا – هەولێر
بە پێی ئاماری لقەکانی یەکێتی سەندیکاکانی کرێکارانی کوردستان لە ساڵی رابردوو، 53 کرێکار گیانیانلەدەستداوە، لەو ژمارەیە 39 کرێکاری ناوخۆ و 14 کرێکاریان خەڵکی دەرەوەی هەرێم بوون.
زۆرترین ژمارەی گیانلەدەستدان لە پارێزگای سلێمانیە 24 کرێکار، پارێزگای هەولێر 11 کرێکار، دهۆک 7 کرێکار، گەرمیان 10 کرێکار، زاخۆ 1 کرێکار گیانیانلەدەستداوە.
هەنگاو عەبدوڵا خان سەرۆکی یەکێتی سەندیکاکانی کرێکارانی کوردستان بە 964ـی وت، کەمتەرخەمی خاوەنکار و کرێکاران لە کاتی کارکردندا و بەکارنەهێنانی کەلوپەل و پێداویستیەکانی سەلامەتی کرێکار لە شوێنی کار هۆکاربوون بۆ زۆری گیانلەدەستدانی کرێکاران.
بەپێی ئەو ئامارەی یەکێتی سەندیکاکانی کرێکاران بەراورد بە ساڵی 2022 ژمارەی گیانلەدەستدان زیادیکردووە، چونکە لەو ساڵەدا
41 کرێکار گیانیلەدەستداوە 31 کرێکاری ناوخۆ و 10 کرێکارییان خەڵکی دەرەوەی هەرێم بوون، ئەو کرێکارانەشی بریندار بوون ژمارەیان 10 کەس بوون.
پێداچوونەوە: توانا نەقی
