چەمچەماڵ .. دوكانێك سووتا زیانی 12 دەفتەر دۆلاری لیکەوت

+964

هۆگر عەدنان- چەمچەماڵ

دوكانێكی شیرینی لە چەمچەماڵ دەسووتێت، بەرگری شارستانیش دەڵێ: 120 هەزار دۆلار زیانی هەبووە.

بەرەبەیانی ئەمڕۆ پێنجشەممە پێنجی کانونی دووەم، دوکانی شیرینییەک لە ناو بازاڕی چەمچەماڵ سووتا، زیانی گیانی نەبووە.

لوقمان حەسەن، بەڕێوبەری پۆلیسی بەرگری و شارستانی چەمچەماڵ بە +964ـی وت “ئاگرەكە كۆنترۆڵ كراوەو هیچ زیانێكی گیانیش نەبووە، بەڵام زیانی مادی زۆری هەبووە”.

بەقسەی بەرگری شارستانی چەمچەماڵ، دوكانەكە بەهۆی شۆرتی كارەباوە سووتاوە، 120 هەزار دۆلار کە دەکاتە 12 دەفتەر، زیانی بەركەوتووە.

زیاتر وتی “توانراوە رێگری لە تەشەنەكردنی ئاگرەكە بگیردرێت، دوكانەكانی دیكە نەسووتان”.

دوكانەكە لەنێو بازاڕی چەمچەماڵ دایە، تایبەتە بە بەرهەمەكانی شیرینی و چەندین جۆر شیرینی جیاوازی تێدایە.