کارمەندێکی بەرگری شارستانی راپەڕین رێنمایی دەداتە ئەو شوێنەی سەردانی کردووە - وێنە: بەرگری شارستانیی راپەڕین
هەر شوێنێک پابەند نەبێت دادەخرێت
بەرگریی شارستانیی راپەڕین کەوتووەتەخۆی
964+
پێشەوا محەمەد
بەرگری شارستانیی راپەڕین هەڵمەتی جێبەجێکردنی رێنماییە سەلامەتییەکانی لە سنوورەکەیدا دەستپێکردووە و دەڵێت، هەرشوێنێک پابەند نەبێت دادەخرێت.
بەڕێوەبەرایەتییەکە سەرجەم هۆڵەکان، زانکۆ و کۆلێژ و بەشەناوخۆییەکان، هۆتێل و رێستۆرانت و کافێیەکان بەسەر دەکاتەوە.
کاوە خدر، بەڕێوەبەری بەرگریی شارستانیی راپەڕین بە 964ـی راگەیاند، هەڵمەتەکەیان دوو رۆژە بەردەوامە و تا سەردانی سەرجەم شوێنەکانیش نەکەن هەر بەردەوام دەبن.
وتیشی، “بەشێک لە شوێنەکان پابەند نەبوون و هۆشدارییان دراوەتێ، هەندێ شوێنی دیکە کاتیان ماوە بۆ جێبەجێکردنی رێنماییەکان و سەرقاڵی ئامادەکردنین، هەموو ئەوانەش دەکەین بە راپۆرت و رەوانەی سەرووی خۆمانی دەکەین”.
شەوی هەینی رابردوو 8.12.2023ـی بەهۆی کەوتنەوەی ئاگر لە باڵەخانەیەکی نیشتەجێبووندا لە قەزای سۆران 14 کەس گیانیان لەدەست دا و حەوتی تریش بریندار بوون.
هەروەها دوێنێ تەنیا لە سنووری هەولێر پێنج حاڵەتی ئاگرکەوتنەوە روویانداوە.
“هەر شوێنێک پابەندی رێنماییەکانی سەلامەتی و بەرگری شارستانی نەبێت دایدەخەین”، ئەوەش قسەی کاوە خدرە.
