شەوى رابردوو لە سۆران چى روویدا

+964
ئاکام غەفور-سۆران

شەوى رابردوو بۆ قەزاى سۆران شەوێکى کارەساتبار بوو، لەلایەک بەهۆى کەوتنەوەى ئاگر لە یەکێک لە باڵەخانەکانى نیشتەجێبون 14 هاوڵاتى گیانیان لەدەست دا، سەرەڕاى ئەوەش دو رووداوى دیکەى هاتوچۆش بریندارى لێکەوتەوە.

رووداوى ئاگرکەوتنەوەکە کاتژمێر 08:30 خولەکی شەوی رابردوو لە باڵەخانەیەکى نیشتەجێبوون کەوتەوە کە دەکەوێتە سەنتەرى شارى سۆران، بە پێى دوایین ئامار، کە دەست 964 کەوتووە، لە کۆى رووداوەکە 21 کەس گواستراونەتەوە بۆ نەخۆشخانەى ئاشتى لە سۆران، لەو ژمارەیەدا 14 کەس گیانیان لەدەستداوە و حەوت کەسیش بریندار بوون.

بەیانى ئەمڕۆ شەممە، پەیامنێرى 964 لە سۆران، سۆراغى رەوشى تەندروستى بریندارەکانى کرد، بە پێى لێدوانى بەرپرسانى تەندروستیى شارەکە، دۆخى تەندروستى بریندارەکان جێگیرە و مەترسییان لەسەر نییە.

لە ئاگرەکەی سۆران ژمارەی گیانلەدەستدان گەیشتە 14 کەس

لە کاتى رووداوەکەى سۆراندا، وابڵاوکرایەوە کە پاسێکى گەشتیاران لە نزیک پردى حافیز لە سنوورى ئیدارەى سۆران وەرگەڕاوە و 17 کەس بریندار بوون و کەسێک گیانى لەدەستداوە، بەڵام بەپێى بەدواداچونى 964 ، دەرکەوت هیچ رووداوێکى لەو شێوەیە رووینەداوە و بڵاوبونەوەى هەواڵەکە، راست نەبوو.

لە کاتى گواستنەوەى بریندارەکانى شەوى رابردووى باڵەخانە سووتاوەکەش، رووداوێکى هاتوچۆ لە ناو بازاڕى سۆران لە نێوان ئامبوڵانسێک و ئۆتۆمبێلێک روویدا و تەنیا زیانى مادیی لێکەوتەوە.

هاوکات، لە رووداوێکی دیکەدا لە نزیکی پەیمانگەی هونەرە جوانەکانی رواندز، ئۆتۆمبێلێک لە رێگا لایدا و بەهۆیەوە کەسێک بریندار بوو.

پێداچوونەوە: وریا فەتاح

لێکۆڵینەوە لەسەر روداوەکەی سۆران دەستیپێکرد