قوتابیانی گوندەکانی سنووری خورماتوو پشکنینی تەندروستییان بۆ دەکرێت

964+

سیروان خورشید – دوزخورماتوو

هەڵمەتی پشکنینی تەندروستی بۆ قوتابیانی قوتابخانە کوردیەکانی گوندەکانی سنووری دوزخورماتوو دەستیپێکرد.

لە دوێنێوە لەلایەن بنکەی تەندروستی دوزخورماتووە هەڵمەتێک بۆ ناو قوتابخانەکانی گوندەکانی سنورەکە دەستپێکرد بەمەبەستی پشکنینی قوتابیان لە دژی نەخۆشیە گواستراوەکانی گۆڕانی وەرزی.

مەحەمەد ئەکبەر بەڕێوبەری بنکەی تەندروستی گشتی خورماتوو بە 964ـی وت، لەهەڵمەتەکەدا نزیکەی 10 قوتابخانەیان بەسەر کردووەتەوە، هەڵمەتەکە بۆ خۆپارێزی و دورخستنەوەی ئەو جۆرە نەخۆشیانەیە کە ساڵانە لەکاتی گۆڕانی وەرزدا منداڵان توشی دەبن.

وتیشی، هەڵمەتەکەیان بۆ ماوەی 10رۆژ بەردەوام دەبێت و لەلایەن لیژنەی تەندروستیەوە سەرجەم قوتابخانەکانی گوندەکان بەسەر دەکرێنەوە بۆ ئەوەی پارێزراو بن لەو نەخۆشیانەی کە بەرۆکی ئەو قوتابیانە دەگرێت کە تەمەنیان لە نێوان 10 بۆ 15 ساڵانە.

قەزای خورماتوو نزیکەی 50 گوند و ناحیەی لەسەرەو خاوەنی دەیان قوتابخانەن، زۆربەیان کوردین و بێ بنکەی تەندوستین و ئەمڕۆ بووە جێی خۆشحاڵی دایکوباوکانی ئەو گوندانەی کە پشکنینی تەندروستیان بۆ رۆشت و هیواداریشن بەردەوام بەسەر بکرێنەوە.

پێداچوونەوە: توانا نەقی

+1