سەرۆكایەتی شارەوانی سلێمانی _ وێنە: سۆشیاڵ میدیا
"سیمای شاریان تێکداوە"
شارەوانیی سلێمانی زیادەڕۆییەکانی حەوت ناوچە لادەبات
964+
پێشەوا محەمەد
شارەوانیی سلێمانی زیادەڕۆییەکانی حەوت ناوچەی سلێمانی لادەبات و بەرپرسێکی شارەوانیش دەڵێت، لەو ناوچانە سیمای شار تێکدراوە و شەقامەکان رێکدەخەنەوە.
ئەو شوێنانەی شارەوانی بەنیازە زیادەڕۆییەکانیان لابدات بریتین لە؛ شەقامی کانی با، ناو بازاڕی سەرچنار، سەر شەقامی هەواری شار، شەقامی سی مەتری ئازادیی، ناوبازاڕی سلێمانی، شەقامی سالم و چەند شەقامێکی تر.
عوسمان عارف، بەرپرسی بەشی زیادەڕۆیی شارەوانیی سلێمانی بە 964ـی راگەیاند، ئەو شوێنانە هی شارەوانین ئەوانەی زیادەڕۆییان کردووەتە سەر و عارەبانە و مێزیان لێداناوە نە کرێ دەدەن نە باج و بە پاشەڕۆکانیشیان شوێنەکانیان پیس کردووە.
وتیشی، “سکاڵایەکی زۆری هاوڵاتیانمان بۆ هاتووە کە ئەو ناوچانە ئاستەنگی هاتوچۆی تێدا دروست بووە و سیمایەکی ناشارستانیان بەو شوێنانە بەخشیوە”.
پێشتر چەند جارێک شارەوانیی سلێمانی هەوڵی لابردنی ئەو زیادەڕۆییانەی داوە، بەڵام دواتر دروستبوونەوە.
“وەزارەتی شارەوانی نووسراوی بۆ کردووین ئەگەر بێت و ئەو زیادەڕۆییانە لانەبەین ئەوا بە کەمتەرخەم لە قەڵەممان دەدات”، ئەوەش قسەی عوسمان عارفە.
