وێنەی دەرمانخانەیەک - فۆتۆ: کوالێتی کۆنتڕۆڵی دەرمان.
لەبەردەم نەخۆشخانەکان هۆشیاری بە نەخۆش دەدرێت
کاریگەرییە لاوەکیەکانی دەرمان دەکرێتە کەمپین
964+
فەهمی نەبی
کوالێتی کۆنتڕۆڵی دەرمان رایگەیاند بۆماوەی هەفتەیەک هەڵمەتێک بەڕێوەدەبەن لەپێناو هۆشیارکردنەوەی هاوڵاتیان بەرامبەر کاریگەریە لاوەکیەکانی بەکارهێنانی دەرمان.
بڕیارە هەڵمەتەکە لە 6.11.2023 تاوەکو 12.11.2023 بەڕێوەبچێت.
د.محەمەد خورشید وتەبێژی کوالێتی کۆنتڕۆڵی دەرمان بۆ 964 وتی، “ئەو کەمپینە ساڵانە بەهاوکاری زانکۆی ئۆپسالای سوید بەڕێوە دەبەین، ئەوان هەماهەنگیان لەگەڵ زیاتر لە 100 وڵات هەیە و ساڵانە ئەو کەمپینە ئەنجامدەدرێت، ئەمساڵیش لە هەرێم هەفتەیەک ئەو کەمپینە بەڕێوەدەچێت”.
هاوڵاتیان هۆشیاردەکرێنەوە کاتێک دەرمانێک بەکاردێنن و نیشانەیەکی لاوەکیان لێ دەردەکەوێت لەرێگەی لینکێکی راستەوخۆوە دەتوانن نیشانەکانیان بنوسن، لەو لینکە کاریگەریە لاوەکیەکانی دەرمانەکە تۆماردەکرێت ئەو رۆژەی دەست بەهەڵمەتەکە کرا لینکەکە بڵاودەکرێتەوە، وتەبێژی کوالێتی کۆنتڕۆڵی دەرمان ئەمەی وت.
بەوتەی د.محەمەد خورشید، بڕیارە لەبەردەم دەرمانخانەکان بروشور بدرێتە ئەو کەسانەی دەرمان وەردەگرن.
