ئەو شەقامەی ئەمڕۆ کرایەوە. وێنە:فەرمانگەی میدیا و زانیاری حکومەت.
دەکەوێتە ناوچەیەکی قەرەباڵغ
رێگای فڕۆکەخانە و 120 مەتری خۆش بوو
964+
ژووری هەواڵ
ئەمڕۆ یەکێک لە شەقامە گەورە و خۆشەکانی هەولێر کرایەوە، ناوچە قەرەباڵغ و راقیەکانی وەک ئیمپایەر و شاری خەونەکان و دەروبەری لەسەر شەقامی 100 مەتری دەبەستێتەوە بە شەقامی 120 مەتری.
ئەم شەقامە ماوەیەکی زۆر بوو کێشەی لەسەر بوو، چونکە بەناو گوندی رەشکیندا دەڕۆی، خەڵکی گوندەکەش رازی نەدەبوون گوندەکە چۆڵ بکەن و خۆپیشاندانیان دەکرد، دەیانوت بەو قەرەبووە رازی نین کە پێیان دەدرێت، بەڵام دواتر پرۆژەکە هەر دەستی پێکرد.
درێژی شەقامەکە دوو کیلۆ مەترە و پانییەکەشی 36 مەترە، بە درێژی سێ کیلۆ مەتریش ئاوەڕۆ دروستکراوە، ئەم هەموو کارەش بە دوو مانگ تەواو کراوە.
لقێکی ئەم شەقامە رووی لە فڕۆکەخانەی ئەربیلی نێودەوڵەتییە و رێگای زۆر کەس کورت دەکاتەوە.
لە بەیانی ئەمڕۆوە شەقامەکە کرایەوە و ئێستا بێ کێشە ئۆتۆمبێلی پیادا دێت و دەڕوات.
ساسان عەونی، وەزیری شارەوانی و گەشتوگوزاری هەرێمی کوردستان لەکاتی کردنەوەی پرۆژەکەدا وتی ”پێشتر [شەقامەکە] تەنیا یەک ساید بوو، هەروەها دیمەنێکی ناشرینیشی بەناو جەرگەی پایتەختی هەرێمی کوردستان بەخشیبوو”.
