کەس نییە خزمەتی باخچەکانی دوزخورماتوو بکات

964+
سیروان خورشید – دوزخورماتوو

هاوڵاتیانی دوزخورماتوو گلەییان لە شارەوانی هەیە کە خزمەتی باخچەکانیان ناکەن، شارەوانیش قسەی هەیە و دەڵێت، کرێکاری پێویستیان بۆ ئەو کارە نییە.

قەزاکە خاوەنی 16 باخچەیە و بێ خزمەتگوزارین و چاکسازییان تێدا ناکرێت.

“چەندان جار چووینەتە لای شارەوانی بۆ رێکخستنەوە و پاککردنەوە و چاکسازیکردن لە باخچەکاندا، بەڵام تا ئێستا باخچەکان هەر وەک خۆیانن”، ئەوە قسەی محەمەد رەشید، دانیشتووی گەڕەکی کۆماریی دوزخورماتووە بۆ 964.

شارەوانیی قەزاکەش دان بەوەدا دەنێت باخچەکان بێ خزمەتگوزارین، بەڵام دەڵێن ناتوانن ئەو کارە بکەن.

مەرعی رەشید، بەڕێوەبەری شارەوانی دوزخورماتوو بە 964ـی وت، “22 کرێکارمان هەیە و فریای سەرپەرشتیی باخچەکان ناکەوین”.

دەشڵێت، بۆ ئەوەی بتوانن خزمەتی باخچەکان بکەن پێویستیان بە 70 کرێکارە، “بەڵام وەزارەتی شارەوانیی عێراق هیچ هاوکارییەکمان ناکات”.

پێداچوونەوە: پێشەوا محەمەد