سلێمانی پاڵەوانی کیک بۆکسینگی هەشت وڵاتی عەرەبی کۆکردەوە

964+

یادگار محەمەد – سلێمانی

لە هۆڵی زانکۆی سلێمانی پاڵەوانیەتی نێودەوڵەتی کیک بۆکسینگ بۆ هەڵبژاردەی وڵاتانی عەرەب دەستیپێکرد.

پاڵەوانیەتیەکە بەسەرپەرشتی فیدراسیۆنی کیک بۆکسینگی عەرەب و بەهاوکاری فیدراسیۆنی عێراق بۆ ئاستی پێشکەوتوانی کوڕان و کچان دەستیپێکرد.

ئازاد محەمەد ئەندامی فیدراسیۆنی کیک بۆکسینگی عێراق بە 964ـی وت، عێراق لە یاری کیک بۆکسینگدا دەستێکی باڵای هەیە و پاڵەوانی ئاست بەرزی هەیە، کوردیش بەشێکی گرنگی ئەم یارییەی بەرکەوتووە.

وتیشی، بەهۆی گرینگی ژێرخانی وەرزشی شاری سلێمانییەوە، ئەم پاڵەوانێتییە خراوەتە ئێرە و ئەمەش دەستکەوتێکی گرنگە بۆ یاریزانان و شارەکەیان.

پاڵەوانیەتیەکە بۆ 12 کێشی جیاوازە و لە 51 کیلۆگرامەوە دەست پێ دەکات و تا سەرو 91 کیلۆگرام بەشداردەبێت.

پاڵەوانیەتیەکە لە جۆرەکانی K1 و فول کۆنتاکت و سیمی کۆنتاکت بوو، کە هەشت هەڵبژاردە بەشدارییان کردبوو.

هەڵبژاردەکان پێکهاتوون لە هەڵبژاردەکانی عێراق، میسر، جەزائیر، مەغریب، ئەردەن، یەمەن، فەڵەستین و سوریا.

هەڵبژاردەی عێراق بە 33 یاریزانی کوڕ بەشدارە کە سیانیان کوردن و هەروەها بە حەوت کچە یاریزانیش بەشداری رکابەرییەکانی کردووە کە سەرجەمیان کوردن، بریاریشە سبەی شەممە کۆتایی بە پاڵەوانێتییەکە بێت.

پێداچوونەوە: فەهمی نەبی