بۆ مانگی ئاب کارەبای مۆلیدە لە هەولێر گرانترین و لە دهۆک هەرزانترینە

964+

هاوبەش ئەبوبەکر

نرخی کارەبای مۆلیدە ئەهلییەکان بۆ مانگی ئاب دیاریکرا و نرخی ئەمپێرێک لە هەولێر بەرزترین و لە دهۆکیش نزمترین دەبێت.

ئەمڕۆ یەکشەممە 3.9.2023، قارەمان مەولوود، بەرپرسی مۆلیدە ئەهلییەکانی سنووری پارێزگای هەولێر بە 964ـی راگەیاند، نرخی ئەمپێرێک لە نێوان 15 بۆ 18 هەزار دیناردایە و رۆژانە نزیکەی 12 کاتژمێر و نیو مۆلیدەکان کارەبایان داوە.

هاوکات بەڕێوەبەرایەتیی کارەبای سلێمانیش رایگەیاند، رۆژانە نزیکەی 10 کاتژمێر کارەبای مۆلیدە هەڵکراوە و نرخەکەشی لە نێوان 13 هەزار و 500 بۆ 14 هەزار و 250 دینار دەبێت.

زوهرە یوسف، سەرپەرشتیاری لیژنەی مۆلیدە ئەهلییەکان لە قایمقامییەتی هەڵەبجە بە 964ـی وت، رۆژانە نزیکەی 10 کاتژمێر کارەبای مۆلیدە هەبووە و نرخی ئەمپێرێک لە نێوان 14 بۆ 15 هەزار دینار دەبێت.

لە بارەی دهۆکیش، هەکار هروری، سەرپەرشتیاری لیژنەی موەلیدە ئەهلییەکانی دهۆک بە 964ـی وت، تێكڕا لە مانگی ئابدا 320 کاتژمێر مۆلیدەکان کاریان کردووە و نرخی ئەمپێرێک لە سەنتەری شاری دهۆک 13 هەزار و 250 دینار دەبێت.