“پێنجوێن و بازیان دەتوانن ببنە دابینكەری سەبەتەی خۆراک بۆ هەموو عێراق”

+964

کامیار کەمال – پێنجوێن

لیژنەیەکی وەزارەتی کشتوکاڵ و لیژنەی کشتوکاڵ لە وەزارەتی كشتوكاڵی عێراق سەردانی پێنجوێنیان کرد و رێژەی بەرهەمەکەیان هەڵسەنگاند، دوای گەڕانەوەش بڕیار لە چارەنووسی بەرهەمەکانی کشتوکاڵی پێنجوێن دەدرێت.

هێمن ئیبراهیم  قایمقامی قەزای پێنجوێن کە هاوەڵی لیژنەکە بووە بە 964ی راگەیاند، لیژنەکە لە پێنجوێن سەردانی عەلوە و چەند کێڵگەیەکی کشتوکاڵیان کردووە و بۆ ئەوەی رێژەی بەرهەمەکانی پێنجوێن هەڵبسەنگێنن، تا بزانن بەرهەمی کشتوکاڵی پێنجوێن بەشی چەند دەکات.

وتیشی، شاندی وەزارەتی کشتوکاڵی هەرێمی کوردستانیان لەگەڵە و دەیانەوێت دڵنیایی بدەن لە ماوەی چوار مانگی هاویندا پێنجوێن و بازیان دەتوانن ببنە سەبەتەی خۆراک بۆ هەموو عێراق.

باسی لەوەش کرد، لیژنە کشتوکاڵییەکانی عێراق دوای گەڕانەوە راپۆرت دەدەنە وەزارەتی کشتوکاڵ تا بڕیار بدرێت هاوردەکردنی بەرهەمی کشتوکاڵی رابگیرێت و بەرهەمی کشتوکاڵی پێنجوێن بە بازاڕ بکرێت و ساغ بکرێتەوە.

ئەوە لە کاتێکدایە، لە ماوەی هەفتەی رابردوودا دووجار جوتیارانی قەزای پێنجوێن سەردانی وەزارەتی کشتوکاڵیان کردووە لە بەغدا و جارێکیش سەردانی وەزارەتی کشتوکاڵی هەرێمی کوردستانیان کردووە و دوای دووەم سەردان، بڕیاردرا لیژنەیەک پێکبهێندرێت و سەردانی پێنجوێن بکرێت.

ساڵی رابردوو، جوتیارانی پێنجوێن بەهۆی ساغ نەبوونەوەی بەرهەمەکانیان چوونە بەردەم وەزارەتی کشتوکاڵی عێراق و داوایان کرد دەروازەکانی عێراق دابخرێت بەرووی هاوردەکردنی بەرهەمی کشتوکاڵی.

ساڵانە لە قەزای پێنجوێن زیاتر 81هەزار دۆنم زەوی کشتوکاڵی بە بەرهەمە کشتوکاڵییە هاوینەییەکان دەچێندرێت.

پێداچوونەوە: ئەرسەلان عەبدوڵا