دوو دیمهن، ئۆتۆمبێلێكى كۆمپانیاى MRF زبڵ كۆدهكاتهوه و حاویهى پلاستیك كه شاره‌وانى دابه‌شی كردوون.. وێنه: شاره‌وانى كه‌له‌كچی
شاره‌وانى: خه‌ڵك له یه‌كتریان جیا ناكاته‌وه
ناحیه‌ى كه‌له‌كچی كێشه‌ى زبڵى ته‌ڕ و وشكى بۆ دروستبووه
964+
فه‌رهاد حه‌سه‌ن
شاره‌وانیى ناحیه‌ى كه‌له‌كچى له‌گه‌ڵ هاوڵاتیانى سنووره‌كه‌ى، كێشه‌ى جیاكردنه‌وه‌ى زبڵ و خاشاكى ته‌ڕ و وشكیان بۆ دروست بووه و ده‌ڵێن، پابه‌ندی جیاكردنه‌وه‌ى نابن و كێشه‌یان بۆ كۆمپانیاى پاككه‌ره‌وه دروستكردووه.
دوو هه‌فته له‌مه‌وبه‌ر شاره‌وانى ئه‌م ناحیه‌یه هه‌زار و 530 حاویله‌ى پلاستیكی دابه‌شی سه‌ر بەشێک لە ماڵەکان كرد بۆ ئه‌وه‌ى زبڵ و پاشماوه‌ى ته‌ڕ و وشك به جیا له‌ناو ئه‌م حاویانه دابنێن، به‌ڵام شاره‌وانى ده‌ڵێت “پابه‌ند نابن”.
به پێی ئه‌و خشته‌یه‌ى بۆ كۆكردنه‌وه‌ى زبڵ و پاشماوه له‌و ناحیه‌یه داندراوه، پێویسته خه‌ڵك رۆژانى شه‌ممه، دووشه‌ممه، سێشه‌ممه و پێنجشه‌ممه زبڵى ته‌ڕ له‌ناو ئه‌و حاویانه كۆبكه‌نه‌وه و رۆژانى یه‌كشه‌ممه و چوارشه‌ممه‌ش زبڵى وشك.
نه‌شوان سوبحى ئه‌حمه‌د، سه‌رۆكى لیژنه‌ى چاودێرى له شاره‌وانیى كه‌له‌كچی به 964ـى وت، خه‌ڵكى پابه‌ندی ئه‌م پلانه‌ى ئه‌وان نابن و وه‌ك پێویست هاوكار نین بۆ جیاكردنه‌وه‌ى زبڵ و پاشماوه‌كانیان.
وتیشی “له‌لایه‌ن كۆمپانیاى MRF ـه‌وه شه‌ش رۆژ له هه‌فته‌یه‌كدا زبڵ و پاشماوه كۆده‌كرێته‌وه، به‌ڵام جیانه‌كردنه‌وه‌ى له‌لایه‌ن هاوڵاتیانه‌وه كێشه‌ى بۆ كۆمپانیاكه دروست كردووه”.
شاره‌وانیى كه‌له‌كچى داوا له هاوڵاتیانى سنووره‌كه‌ى ده‌كات پابه‌ند بن به جیاكردنه‌وه‌ى پاشماوه‌كانیان، بۆ ئه‌وه‌ى وه‌ك پێویست بتواندرێت خزمه‌تیان بكرێت.
