وەزارەتی کار 10 هەلی کار بۆ خەڵکی سلێمانی رادەگەیەنێت

964+

هاوبەش ئەبوبەکر

وەزارەتی کار و کاروباری کۆمەڵایەتی ژمارەیەک هەلی کاری بەشێوەی گرێبەست، بۆ دەرچووانی زانکۆ و پەیمانگاکان و دەرچووانی ئامادەیی، ناوەندی و سەرەتایی راگەیاند.

ئەمڕۆ پێنجشەممە 24.8.2023، ئاریان ئەحمەد وتەبێژی وەزارەتی کار و کاروباری کۆمەڵایەتی بە 964ـی راگەیاند، ئەو هەلی کارانە تەنیا بۆ سنووری پارێزگای سلێمانین و نزیکەی 10 هەلی کارن بۆ ئەو دەرچووانەی کە بڕوانامەی بەکالۆریۆسیان هەیە لە بەشی IT ، ژمێریاری، کارگێری، یاسایی، ئەندازیاری میکانیک، توێژەری کۆمەلایەتی و زمانی ئینگلیزی.

وتیشی، جگە لە سلێمانی، ژمارەیەک هەلی کاری دیکەش هەن بۆ پارێزگاکانی دیکەی هەرێمی کوردستان، بەم نزیکانە رایاندەگەیەنن.

هەروەها دەرچووانی ئامادەیی، ناوەندی و سەرەتاییش دەتوانن فۆڕم پڕبکەنەوە بۆ پیشەی شۆفێری.

بڕیارە رۆژانی 27 و 28ـی ئەم مانگە (ئاب)، کاتژمێر 9:00ی بەیانی لە بەرێوەبەرایەتی کاری سلێمانی، لەناو بینای دەستەبەری (ضمان) سەروو بەریدەکە، فۆڕم دابەشبکرێت و دامەزراندن بە چەند مەرجێک و بەپێی خاڵبەندی دەبێت.

پاش دابەشکردنی فۆڕم، دەبێت لە ماوەی سێ رۆژدا فۆرمەکان بگەڕێنرێنەوە ھەمان شوێن.

مەرجەکان بۆ کەسی شیاو ئەمانەن:

• پێویستە خوازیار تەمەنی لە نێوان 18-40 ساڵ بێت
• پێویستە خوازیار دانیشتووی سلێمانی بێت
• پێویستە خوازیار زانیاری راست و دروست پێشکەش بکات و لە ئەگەری تۆمارکردنی زانیاری هەڵە و نادروست داواکاری دامەزراندنی رەتدەکرێتەوە
• نابێت خوازیار موچەخۆر بێت لە هیچ دامودەزگایەکی حکومی و کەرتی تایبەت

وەزارەتی کار و کاروباری کۆمەڵایەتی دەڵێت، ئارەزومەند پێویستە بەڵگەنامەکانی (ئەصڵی و کۆپی کراو) لە رۆژی سەردانکردنی ئامادەبکات (کارتی نیشتیمانی، کارتی زانیاری، پشتگیری موختاری گەڕەک،  بڕوانامە یان پشتگیری دەرچوون) .