لە زاخۆ 35 تۆن ئارد دەستی بەسەردا گیرا

964+

شڤان عەبدوڵا – زاخۆ

لە زاخۆ دەست بەسەر 35 تۆن ئارددا گیرا، کە خاوەنەکەی ویستویەتی بیباتە دەرەوەی شار و بیفرۆشێت.

ئاردەکە لەڕووی کوالیتییەوە باشە و هیچ کێشەی نییە، بەڵام قایمقامیەی زاخۆ بردنەدەرەوەی ئاردی قەدەغە کردووە.

ئەمڕۆ چوارشەممە 9.8.2023، وەڵات هەجەر، سەرۆکی لیژنەی چاودێریی بازاڕ بە 964ـی راگەیاند، خاوەنی ئەو 35 تۆن ئاردە نزیکەی پێنج ملیۆن دینار پێبژاردنی بۆ دەکرێت.

هەر ئەمڕۆ لیژنەکانی قایمقامیەتی زاخۆ دەستیان بەسەر یەک تۆن و 120 کیلۆ بۆیاغدا گرت، خاوەنی ئەم بۆیاغەش بە بڕی یەک ملیۆن و 500 هەزار دینار پێبژاردنی بۆ کرا و بۆیاغەکەی لەناوبرا.

لەسەر زیادەڕۆییکردنیش بۆ سەر شەقامەکان، حەوت مارکێت داخران و سەرۆکی لیژنەی چاودێریی بازاڕ دەڵێت، هەتا کەلوپەلەکانیان رێکوپێک نەکەن و لەسەر شەقام لاینەبەن، بە داخراوی دەمێننەوە.

پێداچوونەوە: هاوبەش ئەبوبەکر