بلیتی سینەما لە هەولێر گرانترینە و لە سلێمانی هەرزانترینە

964+

فەهمی نەبی

بەپێی بەدواداچوونی 964 نرخی بلیتەکانی چوونە ژوورەوە لە سینەماکانی هەر سێ پارێزگای هەرێم جیاوازیان هەیە، بەجۆرێک لە سلێمانی نرخی بلیت هەرزانترین و لە هەولێر گرانترینە.

لە پارێزگای هەولێر، تەنیا یەک سینەما هەیە لە فامڵی مۆڵ، نرخی بلیتی چوونە ژوورەوە لەنێوان 10 بۆ 14 دۆلارە.

لە پارێزگای سلێمانی دوو سینەما هەیە، سیتی سینەما و سینەما سالم، نرخی بلیت لە سینەما سالم پێنج هەزار و لە سیتی سینەما 10 هەزار دینارە، بەڵام هەندێکجار داشکان بۆ خوێندکاران دەکرێت و دەکرێتە پێنج هەزار دینار.

لە پارێزگای دهۆک تەنیا یەک سینەما هەیە، ئەویش سینەمای دهۆک مۆڵە، نرخی بلیتی چوونە ژوورەوە 11 هەزار دینارە و رۆژانی دووشەممە دەبێتە پێنج هەزار دینار.

هەردی حەسەن پێشوتر خاوەنی سینەما بوو لە هەولێر، بەڵام ماوەی چەند مانگێکە بەهۆی بێ بازاڕی دایخستووە، بۆ 964 قسەیکردووە دەلێت، هۆکاری بەرزی ئەو نرخانە پەیوەندی بەو گرێبەستە هەیە کە لەگەڵ کۆمپانیا بیانییەکان هەیانە، کۆمپانیاکان لە دوبەی نوسینگەیان هەیە، بەشێک لە سینەماکان لەگەڵ ئەو کۆمپانیایانە گرێبەست دەکەن.

هەردی حەسەن ئەوەشی وت، بۆ نیشاندانی هەر فیلمێک دوو مانگیان بۆ دیاریدەکەن، بەشێوەی ئۆنڵاین DCP دێت، بەشێک لەو پارەیە بۆ ئەو کۆمپانیایانە دەبێت کە کاریان دابەشکردنی فیلمە.

کامەران نوری، بەڕێوەبەری بەڕێوەبەرایەتی سینەمای سلێمانی بە 964ی وت، بەڕێوەبەرایەتی سینەما لە شارەکان هیچ رۆڵێکیان نییە لە دیاریکردنی ئەو نرخانە.

کامەران نوری ئەوەش دەڵێت، پێشوتر لە هۆڵی بەڕێوەبەرایەتی رۆشنبیری سینەما فیلم نمایشکراوە، بەڵام ئێستا وەستاوە، بەڕێوەبەرایەتی سینەما لە سلێمانی دوو ساڵە هیچ فیلمێکی بەرهەم نەهێناوە.