خاوەنی مانگا و ئاژەڵی بەرەڵا غەرامە دەکرێن

964+

هۆگرعەدنان – چەمچەماڵ

ماوەی دوو رۆژە هەڵمەتی دەستبەسەرداگرتنی مانگا و ئەسپ و گشت جۆرە ئاژەڵێکی بەرەڵا لە بازیان دەستیپێکردووە و خاوەنەکانیان غەرامە دەکرێن.

ئەم هەڵمەتە لەلایەن شارەوانی قەزای بازیانەوە دەکرێت، وەک رێکاریک دژی بڵاوبونەوەی پەتای خوێنبەربوون و پاکڕاگرتنی ژینگە و سیمای قەزای بازیان

هەڵمەتەکە دەستبەسەرداگرتنی سەگی بەرەڵا ناگرێتەوە، چونکە سەگە بەرەڵاکان پەیوەندیدارن بە بەشی ڤێتێرنەری بازیان.

نەوزاد جەلال، سەرۆکی شارەوانیی قەزای بازیان بە 964ـی راگەیاند، دوای کۆبوونەوەی لیژنەی باخچەکان و لیژنەی بەشی زیدەڕۆیی لە شارەوانی ناوەندی قەزای بازیان، هەڵمەتی دەستبەسەرداگرتنی مانگاو ئەسپ و تەواوی ئەو ئاژەڵانەی لەلایەن خاوەنەکانیانەوە بەرەڵا دەکرێن ئەنجامدەدەن، جاری یەکەم بڕی 50 هەزار دینار غەرامەی خاوەنی ئاژەڵەکان دەکەن، بۆ جاری دووەم و سێیەم بڕی غەرامەکان دەبێتە دوو هێندە و سێ هێندە، بۆ جاری چوارەم ئەگەر ئاژەڵەکانیان بەرەڵا بکەن، دەستی بەسەردا دەگیرێت و نادرێتەوە پێیان.

وتیشی، لە هەموو ناوەندی قەزای بازیان نزیکەی 100 ئاژەڵداری تێدایە، تەواوی خەڵکی بازیان ناکەین بە قوربانی لەبەر بەرژەوەندی چەند کەسێک، ئەم هەڵمەتە لە پێناو رێگری و تەشەنە نەسنەندنی پەتای تای خوێنبەربوونە لەو سنوورە،

ئاماژە بەوەش دەکات، داوا لە هاوڵاتیان دەکەن ئاژەڵەکانیان بەرەڵا نەکەن و دواتر خەڵک بنێرن بۆ تەکلیف و لە ماوەی رابردووشدا چەندان جار ئاگادارکراونەتەوە و سەرپێچی یاساکانیان کردووە، بەڵام ئەم جارە رێکارەکان زۆر توندتر دەکەنەوە.

پێداچوونەوە: توانا نەقی