شەقام و گەڕەکەکانی سلێمانی قیرتاو دەکرێنەوە

964+

توانا نەقی

تیمەکانی شارەوانی سلێمانی سەرقاڵی قیرتاوکردنی شەقامەکانی چەند گەڕەکێکی شارەکەن و نۆژەندەکرێتەوە حەفتانە هەزاران مەتر قیر دەکەن.

کاری قیرتاوکردنەکە هەریەک لە شەقامی بەردەم بانکی کوردسات، چاککردنی شەقامی بەختیاری و چاککردنی چەند شەقامێک لەنا و بازاڕ دەگرێتەوە.

زەردەشت رەفیق، وتەبێژی سەرۆکایەتی شارەوانی سلێمانی بە 964ـی راگەیاند، لەسەر بودجەی لە 15%ـەی سەرۆکایەتی شارەوانی سلێمانی کە بەردەوامە ئێستا حەفتانە نزیکەی 40 هەزار مەتر قیرتاو دەکەن.

وتیشی، لە ئێستادا کەش و هەوا گونجاوە و داهاتیشیان لەبەردەستە، بۆیە بەردەوامن لە قیرتاوکردن و نۆژەنکردنەوەی زۆرێک لە شەقامەکانی سلێمانی.

سەبارەت بە سێ پرۆژەی یەکتربڕ و ئەندەرپاس کە لە جێبەجێکردندان زەردەشت رەفیق دەڵێت، هەرسێ پرۆژەی یەکتربڕی ئارام، یەکتربڕی بەختیاری و ئەندەرپاسی فاروق کارەکانی بەباشی دەڕوات، بەڵام پێناچێت ئەمساڵ هیچ کامێکیان تەواو ببێت.