هاوڵاتیان بۆ مەلەوانی روو لە بەنداوی سەروچاوە دەکەن
964+
مەجید بتوێنی
لە مانگی 10ی پار، ئاوی بەنداوی سەروچاوە لە ناحیەی بێتواتەی ئیدارەی راپەڕین بە مەبەستی پاککردنەوەی لەقوڕولیتە ئاوەکەی بەردرایەوە و بەنداوەکە وشککرا.
کارەکە 20 رۆژلەمەوبەر لەلایەن بەڕێوەەبەرایەتی بەنداوەکانی هەرێم و بە پشتیوانی دارایی رێکخراوی (GIZ)ی ئەڵمانی تەواوکرا و دووبارە ئاوەکەی گلدرایەوە.
لە دوای پاککردنەوەی بەنداوەکە و هاتنی وەرزی گەرما، هاوڵاتیان بۆ مەلەوانی و بەسەربردنی کاتێکی خۆش رووی تێدەکەن چونکە شوێنێکی گەشتیاری سەرنجڕاکێشی ئیدارەی راپەڕینە.
لەگەڵ گلدانەوەی ئاوەکە و لەبەر زۆری گەشتیار لەسەر بەنداوەکە، هەروەها بۆ پاراستنی گیانی هاوڵاتیان لە خنکان، بەرگری شارستانی راپەڕین تیمێکی مەلەوانی لەسەر بەنداوەکە جێگیرکردووە و بۆ یەکەمجاریش بەلەمێکی فریاگوزاری بۆ تیمەکە دابینکرا.
بەنداوی سەروچاوە سەرچاوەی ئاوەکەی چەند کانیاوێکی هەڵقوڵاوی ناو شاروچکەی سەروچاوەیە، تایبەتمەندی ئاوەکە پاکە و شیاوە بۆ خواردنەوە، زۆر ساردە، بۆیە هاوڵاتیان زیاتر حەزیان بە مەلەوانیە تیایدا.
بەنداوی سەروچاوە لە ساڵی 2008 لەلایەن حکومەتی عێراقەوە لەسەر رووبەری 122هەزار و 500 مەتر دووجا دروستکراوە و توانای گلدانەوەی یەک ملیۆن و 500 هەزار مەتر سێ جا ئاوی هەیە.
بەنداوەکە لە ئێستادا بووەتە سەرچاوەی ئاوی خواردنەوە بۆ ناحیەکە و شوێنێکی گەشتیاری دیاری دەڤەرەکەیە، بەشێکی زۆری زەوییە کشتوکاڵیەکانی دەشتی بیتوێنیش بەراو دەکات.
