سەروچاوە لە تەپوتۆز رزگاردەكرێت
964+
مەجید بیتوێنی
لەسەر بودجەی پەرەپێدانی پارێزگاکان بۆ ساڵی 2022 زیاتر لە 14 هەزار مەتر دووجا قیڕتاوکردنی کۆڵانەکانی شارۆچکەی سەروچاوەی ناوەندی ناحیەی بێتواتە لەئیدارەی ڕاپەڕین دەستی پێکرد.
ئیبراهیم مەحمود، بەڕێوەبەری ناحیەی بێتواتە بە964ـی وت، ئەم پڕۆژەیە دەبوایە پارساڵ تەواو بکرێت، بەڵام بەهۆی نەبوونی پارەی نەختینە کارەکە نەکرا.
“ئێستا بە گەرمی دەستبە کارەکان کراوە بەمەش بەشێکی زۆری کۆڵانەکانی سەروچاوە قیرتاو دەکرێت”. ئیبراهیم مەحمود وای وت.
نەبوونی پارەی نەختینە لە بانک تەنیا ئەو پڕۆژەیەی دوانەخستووە بەڵکو سەرجەم پڕۆژە پێشنیارکراوەکانی ساڵی 2022 و 2023 بایی زیاتر لە دوو ملیار دینارە لە سێکتەرە جیاوازەکان بۆ سنووری شارەوانی ناحیەکە و گوندەکانی دەرچووە، چاوەڕێی پەسندکردنی بودجەی عێراق دەکرێت بۆ تەواوکردنیان ئەمەش بە وتەی بەڕێوەبەری ناحیە بێتواتە.
پێداچونەوە: كوردستان ئەحمەد
