لە هەولێر 13 بەنزینخانە بەهۆی فرۆشتنی بەنزینی کوالێتی خراپ داخران

964+

هاوبەش ئەبوبەکر

لە ماوەی 20 رۆژی رابردوودا لە هەولێر، 13 بەنزینخانە بەهۆی فرۆشتنی بەنزینی کوالیتی خراپ و پابەندنەبوون بە رێنماییەکان داخراون.

ئەمڕۆ سێشەممە، نەبەز عەبدولحەمید قایمقامی هەولێر لە فەیسبووکی خۆی رایگەیاند، لە رێکەوتی 13.5.2023 تاوەکو 1.6.2023 پشکنینیان بۆ 132 بەنزینخانە کردووە و لەو ژمارەیە 13 دانەیان بەهۆی فرۆشتنی بەنزینی بێکوالیتی داخراون.

لە رێکەوتی 30.4.2023 وەزارەتی سامانە سروشتییەکان بڕیاریدا، نرخی بەنزین بۆ پاس و تاکسی و هەموو ئۆتۆمبێڵێک بکرێتە 750 دینار بۆ هەر لیترێک.

لەدوای بەردەستبوونی ئەو جۆرە لە بەنزین، بەشێکی زۆر لە هاوڵاتیان گلەیی لە کوالیتی بەنزینەکە دەکەن.