عێراق كشتوكاڵی بەراوی قەدەغەكرد

964+

پێشەوا محەمەد – سلێمانی

بەهۆی كێشەی كەم ئاوی حكومەتی عێراق كشتوكاڵی بەراوی قەدەغەكرد و داوا لە جوتیارانیش دەكات بە شێواز و سیستمی نوێ كشتوكاڵ بكەن.

كشتوكاڵی بەراو، بەو جۆرە كشتوكاڵە دەڵێن، كە جوتیاران لە نزیكی گوند و رووبار و دەریاچە و شارەكاندا دەكرێت، ئەم جۆرە كشتوكاڵە پێویستی بە ئاوێكی زۆر و خزمەتێكی زیاتر هەیە.

وەزارەتی سەرچاوە ئاوییەکانی عێراق دەڵێت، عەمباری ئاوی عێراق بەراورد بە ساڵی رابردوو بە رێژەی سەدا 60 دابەزیوە، رێژەی بەردانەوەی ئاویش لەلایەن وڵاتانەوە بۆ کەمترین ئاستی 100 ساڵی رابردووی دابەزیوە.

عەبدولرەحمان خانی، بەڕێوەبەری بەنداوەکانی هەرێم بە 964ی وت، “هەرێمی كوردستان و بەغدا رێککەوتن لەسەر بەردانەوەی ئاوی بەنداوەکان بۆ ناوەڕاست و باشووری عێراق، بەڵام تەنیا بۆ بەرهەمهێنانی کارەبا و خواردنەوە نەک بۆ کشتوکاڵ”.

بەپێی ئامارەكانی وەزارەتی كشتوكاڵی عێراق ٪50ی زەویەبەراوەكانی عێراق دەبێت بكرێنە زەوی دێم، بۆ ئەوەی ئاوی زیاتری بۆ تەرخانبكرێت.

كشتوكاڵی دێم، بەو جۆرە كشتوكاڵە دەڵێن، كە كەمترین ئاو خزمەتی پێویستە،دەتوانێت بەرهەمی تەواوەتی بۆ خاوەنەكەی دەستبخات.

كێشەی كەم ئاوی یەكێكە لە كێشە بەرچاوەكانی جیهان و چەندین جار نەتەوەیەكگرتوەكان كۆبونەوەی تایبەتی لەسەر كردووە، لە 22 ,تا 24ی مارچی 2022 لە نیویۆڕك كۆنگرەی ئاو ئەنجامدرا و عێراقیش تێیدا بەشداریكرد.