78 تراکتۆر بەخۆڕایی بەسەر جوتیاران دابەشکرا

964+
عەمار عەزیز

لە کۆمەڵگای باگێرا لە سنوری ناحیەی زاویتەی دهۆک، 78 تراکتۆری بچوک بەسەر جوتیارانی دەڤەرەکە دابەشکران لە لایەن رێکخراوی GIZی ئەڵمانییەوە.

ئەمە رۆژی پێنجشەممە بووە، 25.5.2023.

رێکخراوی GIZی ئەڵمانی رێکخراوێکی نێودەوڵەتییە و لەسەر ئاستی جیهان خەریکی هاوکاریکردنە لەژێر ناوی “گەشەپێدان”.

بۆ ئەو 78 تراکتۆرە، هەزار و 480 جوتیاری دهۆک ناویان نوسیبوو، بەڵام بە تیروپشک تەنیا 78 کەسیان وەریان گرت.

بەختیار ساڵح، بەڕێوەبەری چاندنی قەزای دهۆک بە 964ی وت، رێکخراوەکە چەند مەرجێکی هەبوو لەوانە جوتیار دەبێت باغێکی دێمی هەبێت لە سێ دۆنم کەمتر نەبێت، دانیشتووی گوند بێت، هەروەها پێشتر سوودمەند نەبووبێت.

نرخی ئامێرەکان لەنێوان 400 بۆ 900 دۆلارە.

بە قسەی بەختیار ساڵح، جگە لەو 78 تراکتۆرە، رێکخراوەکە 40 تراکتۆری بچوکی داوەتە ئیدارەی سەربەخۆی زاخۆ.