قەرز بە دەرچووانی گەشتوگوزار و خاوەن پڕۆژە دەدرێت

964+

پێشەوا محەمەد – سلێمانی

هەوڵی وەرگرتنی قەرزی بچووک، مامناوەند و گەورە بۆ دەرچووانی بەشی گەشتیاری و خاوەن پڕۆژەکانی ئەو بووارە دەدرێت. دەستەی گەشتوگوزار دەڵێت، دوو هەنگاومان ماوە بۆ جێبەجێکردنی.

دەستەی گەشتوگوزار لەگەڵ هەریەکە لە بانکی ناوەندی و کۆمەڵەی بانکە عێراقییەکان دانیشتنی کردووە و رەزامەندی دراوە ئەو قەرزە بەو کەسانە بدرێت.

ئەوەی ئێستا ماوەتەوە ئەوەیە، چۆن گەرەنتی ئەو بانکانە بکرێت ئەوانەی قەرزەکە وەردەگرن دەیگەڕێننەوە، لەگەڵ دیاریکردنی بڕی قەرزەکە.

ئیبراهیم عەبدولمەجید، بەڕێوەبەری راگەیاندن و پەیوەندییەکانی دەستەی گەشتوگوزاری هەرێم بە 964ی راگەیاند، ئێمە ئێستا سەرقاڵی دانانی شێوازی وەرگرتن و گەڕاندنەوەی پارەکە و دیاریکردنی بڕەکەیداین.

وتیشی، “هەموو قۆناغەکانی تر کۆتاییان هاتووە و تەنیا ئەو دوو هەنگاوە ماوە جێبەجێ بکرێن”.