لە دوو رۆژدا 105 پاسی گەشتیاری سەردانی دهۆکیان کردووە
964+
عەمار عەزیز – دهۆک
لە دوو رۆژی جەژندا 105 پاسی گەشتیاری سەردانی دهۆکیان کردووە، گەشتیاری دهۆکیش دەڵێت: ئەوەی هاتوون گەشتیاری ناوەڕاست و باشووری عێراقن.
ئەمڕۆ شەممە 22.4.2023، زیاتر لە 50 پاسی گەشتیاری سەردانی ناوچە گەشتیارییەکانی پارێزگای دهۆکیان کردووە، ئەمەش لە کاتێکدایە دوێنێ هەینی کە یەکەم رۆژی جەژن بووە بە قسەی گەشتیاری دهۆک 49 پاسی گەشتیاری سەردانی شارەکەیان کردووە.
لە دهۆک 900 هوتێل و موتێل و شوێنی گەشتیاری هەیە لەگەڵ 250 شوێنی سروشتی.
خەیری ئۆسۆ، بەڕێوەبەری گشتی گەشتوگوزاری دهۆک بە 964ـی وت “ئەمڕۆ، تا کاتژمێر 11ـی پێش نیوەڕۆ 56ـی پاسی گەشتیاری هاتوونەتە دهۆک و رەنگە تا ئێوارە بگاتە 60 پاس، هەمووشیان لە پارێزگایەکانی ناوەراست و خوارووی عیراقەوە هاتوون”.
هەر پاسێکی گەشتیاری تاوەکو 50 گەشتیاری تێدایە، بەو پێیەش بێت ئەوا لەم دوو رۆژەدا سەرووی پێنج هەزار گەشتیار روویان لە دهۆک کردووە.
بەڕێوەبەرایەتی گشتی گەشتوگوزاری دهۆک، پێشبینی دەکات لە سێ رۆژی جەژندا 40 بۆ 50 هەزار گەشتیار روو لە شارەکە بکات.
پێداچوونەوە: فەرمان سادق