گوندی گرگەجوو داوای قیر دەكەن
+964
زەید كۆچەر
گوندی گرگەجوو دەكەوێتە نزیك ناحیەی رۆڤیا، كێشەی جادەیان هەیە و داوای قیردەكەن.
گوندەكە دەكەوێتە سەر رێگای بەردەڕەش، رێگاكەیان ناخۆشە، پڕە لە تاسە و چاڵ، هاوڵاتیان گوندەكە چۆڵدەكەن لەبەر ئەوەی رێگاكەیان خراپە.
مەحمود شوكری موختاری گوندەکە، قسەی بۆ پەیامنێری 964 کرد و وتی، داوایان لە شارەوانی رۆڤیا كردووە رێگاكەیان بۆچاك بكەن، بەڵام پێیان وتراوە بودجە نییە.
رێگاكە دوو كیلۆمەتر و نیوە، لە گوندەكە نزیکەی 100 ئۆتۆمبێلی لێیە.
موحسین ئەحمەد، بەڕێوەبەری رێگاوبانی ئاكرێ لەبارەی رێگای ئەو گوندەوە بە 964ی وت، لە ماستەرپلاندایە هەموو كێشەكان چارەسەر بكرێن و رێگاكەش قیربكرێت.
قەزای بەردەڕەش 106 گوندی لەسەرە، ژمارەیەکی زۆر لەم گوندانە رێگایان بۆ براوە و بەشێکیان ماوەتەوە قیرتاو بکرێن.
گوندی گرگەجوو نزیکەی 100 ماڵە، زیاتر لە 500 کەس تێیدا دەژین.
پێداچونەوە: كوردستان ئەحمەد
