پەتاتەکان دڵیان رەش بوو
لە مەرزی باشماخ 100 تۆن پەتاتە رەتکرایەوە
964+
پێشەوا محەمەد – سلێمانی
لە مەرزی باشماخ زیاتر لە 100 تۆن پەتاتەی خراپبوو رەتکرایەوە، کە چەکەرەی مەترسیداری کردبوو و نەخۆشیی “دڵی رەش”ـی گرتبوو.
دڵی رەش دروستبوونی چەکەرەیەکی مەترسیدارە لەناو پەتاتەکە، کە دەبێتە هۆی رەشبوونەوەی ناوەوەی بەرهەمەکە و بۆ خواردن و تەندروستی مرۆڤ مەترسیدارە.
پەتاتەکە دوێنێ سێشەممە 18.4.2023، گەیشتبووە مەرزەکە و دوای ئەنجامدانی پشکنین لەلایەن هۆبەی کەرەنتینەی کشتوکاڵی مەرزەکە، کە سەر بە بەڕێوبەرایەتی کشتوکاڵی سلێمانییە رەتکراوەتەوە.
بەڕێوەبەرایەتی کشتوکاڵی سلێمانی، دوێنێ سێشەممە بڵاویکردەوە ئەو پەتاتەیە لە رێگەی چوار بارەوە لە ئێرانەوە بۆ سنووری پارێزگای سلێمانی رەوانەکرابوو بە مەبەستی ساغکردنەوە.
مەرزی باشماخ دەکەوێتە سنووری پێنجوێن لە پارێزگای سلێمانی و دەروازەی هاتن و چوونی گەشتیاری و بازرگانییە لەگەڵ وڵاتی ئێران.