پیاوێك له چیای ئاسۆس كه‌وته خواره‌وه و حاڵی باش نییه
964+
پیاوێکی 50 ساڵ لە چیای ئاسۆس کەوتە خوارەوە و تیمەکانی بەرگری شارستانی بە هێلیكۆپته‌ر رزگاریان کرد.
پیاوەکە پێش نیوه‌ڕۆی ئه‌مڕۆ شه‌ممه 25.3.2023 لەگەڵ هاوڕێیەکی بە چیای ئاسۆسدا هەڵگەڕاون لە ناحیەی بنگردی سەر بە دوکان، کە بۆ کردنی گیای بەهارە رۆیشتوون، لەسەر چیاکە هەڵدێراوە و زۆری ویستووە تا دەربازیان کردووە.
عەلی قادر وتەبێژی بەرگری شارستانیی رانیە بە 964ی وت، دەمودەست تیمەکانیان چوون بەهانای کەسەکەوە، بەڵام شوێنەکە ئەوەندە سەخت بووە، نەیانتوانیوە رزگاری بکەن، بۆیە داوای هاوکارییان لە تیمی فرۆکەوانیی سلێمانی کردووە و بە هێلیکۆپتەر رزگاریان کردووە.
پیاوەکە براوە بۆ نەخۆشخانەی قەڵادزێ و لەوێوە بەپەلە گواستراوەتەوە بۆ سلێمانی، عەلی قادر دەڵێت ”حاڵی زۆر باش نییە”.