پەڕەی کەشناسی لە فەیسبووک
پەڕەی کەشناسی هەرێم سڕکراوە
میدیازان – هێمن بەکر – هەولێر
ماوەی نۆ مانگە پەڕەی فەیسبووکی کەشناسی هەرێمی کوردستان سڕکراوە و هیچ بابەتێکی تێدا بڵاونەکراوەتەوە، سەرچاوەیەکی بەرپرسیش دەڵێت، لە وەزارەتی گواستنەوە بڕیاری لەسەر دراوە.
پەڕەی بەڕێوەبەرایەتی گشتی کەشناسی و بومەلەرزەزانی هەرێمی کوردستان لە فەیسبووک، پەڕەیەکی ناسراو بوو بۆ هاوڵاتیان و رۆژنامەنوسان.
ئەو پەڕەیە خاوەنی ٧٦ هەزار فۆڵۆوەرە، بەڵام کۆتا پۆستی لە رۆژی ١٧ی مانگی شوباتی ٢٠٢٢ بووە.
رۆژنامەنوسان و کەناڵەکانی راگەیاندن پشتیان پێ دەبەست بۆ دەستکەوتنی زانیاری لەسەر پێشبینییەکانی کەشناسی و بومەلەرزەزانی.
میدیازان پرسیاری کرد لە سەرچاوەیەکی تایبەت لە وەزارەتی گواستنەوە و گەیاندن، کە بەڕێوەبەرایەتی کەشناسی سەر بە ئەوان بوو، سەرچاوەکە تەنیا وتی، هۆکاری وەستانی پەڕەکە گۆڕانکاریی ئیداریی بووە لە پێکهاتەی وەزارەتەکەدا.
لە ئێستادا هۆبەیەکی تایبەت هەیە لە وەزارەتی گواستنەوە بۆ بواری کەشناسی و رۆژانەش پێشبینییەکانی لە پەڕەی فەرمی وەزارەتەکە بڵاودەکاتەوە.
لەلایەکی دیکە، سەرچاوەیەکی تایبەت کە پێشتر کارمەند بووە لە بەڕێوەبەرایەتی کەشناسی و بومەلەرزەزانی بە میدیازانی وت، “ئێمە خۆشمان نەمانزانی بۆچی بەڕێوەبەرایەتییەکەمانیان نەهێشت و کردیان بە هۆبەیەک لە وەزارەت”.