پەرلەمانی عێراق چەند بڕیارێکى لەبەرژەوەندى قوتابیان دەرکرد

964+

وریا فەتاح

ئەمڕۆ دووشەممە 6ی نیسانی 2026، ئەنجومەنی نوێنەرانی عێراق بە سەرۆکایەتی “هەیبەت حەلبوسی” دانیشتنی خۆی ئەنجامدا. دانیشتنەکە بە گۆڕانکاریی لە شێوازی دەستپێکردن و بڕیاردان لەسەر چەندین دۆسیەی گرنگ کۆتایی هات.

دیارترینی بڕیار و پێشهاتەکانی دانیشتنەکە:

1. جێگیرکردنی لیژنە پەرلەمانییەکان: پەرلەمان دەنگی دا لەسەر دیاریکردنی ئەندامانی ئەم لیژنە هەمیشەییانە:

لیژنەی کشتوکاڵ، سەرچاوە ئاوییەکان، زۆنگاوەکان و ژینگە.
لیژنەی کارەبا و وزە.
لیژنەی شەهیدان، قوربانیان و زیندانیانی سیاسی.
2. مژدە بۆ خوێندکاران (ڕاسپاردەکانی لیژنەی پەروەردە): لیژنەی پەروەردەی پەرلەمان، دوای کۆبوونەوە لەگەڵ جێگری یەکەمی سەرۆکی پەرلەمان، چەند راسپاردەیەکی گرنگی ئاراستەی وەزارەتی پەروەردە کرد:

لادانی بەشەکانی کۆتایی: پێشنیازی سڕینەوەی وەرزەکانی کۆتایی پڕۆگرامی خوێندن بۆ هەموو قۆناغەکان (کۆتایی و ناکۆتایی) بەبێ زیانگەیاندن بە ئاستی زانستی.
گۆڕانکاری لە تاقیکردنەوەکان: هەموارکردنی خشتەی تاقیکردنەوە وزارییەکانی پۆلی شەشی ئامادەیى، بە شێوەیەک تاقیکردنەوەکان رۆژ نا ڕۆژ بن.
چاککردنى تێکڕا: دەرکردنی بڕیارێک بۆ چاککردنى تێکڕا کۆنمرەی (تحسین معدل) خوێندکارانی پۆلی شەشی ئامادەیی بۆ ساڵی خوێندنی (2024-2025) بۆ یەک یان دوو بابەت.
تاقیکردنەوە دەرەکییەکان: کردنەوەی سەنتەری تاقیکردنەوە بۆ خوێندکارانی “خارجی” لە ناوەندی قەزاکان نەک تەنها لە سەنتەری پارێزگاکان.
3. گۆڕانکاری لە پرۆتۆکۆڵی دانیشتنەکان: پەرلەمان بڕیاریدا لەمەودوا لەبری بەکارهێنانی “زەنگ”، سروودی نیشتمانی عێراق وەک ئاماژەیەک بۆ دەستپێکردنی دانیشتنەکان بەکاربهێنرێت.

4. دەروازە سنوورییەکان: عەدنان فەیحان، جێگری یەکەمی سەرۆکی پەرلەمان، داوای ئامادەکردنی نەخشەڕێگەیەکی ئابووری کرد بۆ بەڕێوەبردنی دەروازە سنوورییەکان، بە ئامانجی زیادکردنی داهاتی دەوڵەت و پاراستنی بەرهەمی ناوخۆیی.

دواتر ئەنجومەنی نوێنەران کۆتایی بە دانیشتنەکەی هێنا و کۆبوونەوەکە هەڵگیرا.