تەنێک بەر وێستگەی ئەتۆمیی بوشەهر کەوت

+964

ئەرسەلان عەبدوڵا

ئاژانسی نێودەوڵەتیی وزەی ئەتۆمی ئەمڕۆ چوارشەممە رایگەیاند، ئێوارەی دوێنێ سێشەممە تەنێکی هاوشێوەی پارچە مووشەک لە نزیک وێستگەی ئەتۆمیی بوشەهر لە ئێران کەوتووەتە خوارەوە و لەلایەن ئێرانەوە ئاگادار کراونەتەوە.

ئاژانسەکە لە رێگەی پلاتفۆرمی X ی خۆیەوە بڵاویکردەوە، پاشماوەی تەنێکی هاوشێوەی پارچە مووشەک و درۆن بەر بینای وێستگەی ئەتۆمیی بوشەهر کەوتووە، پشتڕاستیش کراوەتەوە هیچ زیانێکی گیانی و ماددەی نەبووە و زیان بەر دامەزراوەکەش نەکەوتووە.

لە پێشهاتێکی پەیوەندیداردا، رافایل گرۆسی، بەڕێوەبەری گشتیی ئاژانسی نێودەوڵەتیی وزەی ئەتۆمی، داوای دانبەخۆداگرتنی کردووە و دووپاتی کردەوە و هۆشداریشی دا لە مەترسییەکانی رووداوی ئەتۆمی.

ئەم پێشهاتە دوای بەرفراوانبوونی هێرشە سەربازییەکانی شەڕی ئەمریکا و ئیسرائیل و ئێران دێت لە ناوچەکەدا، کە ئەمریکا و ئیسرائیل لە 28ی شوباتەوە هێرشیان بۆ سەر ئامانجەکانی ناو خاکی ئێران دەستپێکردووە و لە ئەنجامدا وێرانکاری و زیانی گیانی بەرچاوی لێکەوتووەتەوە، هەروەها کوژرانی عەلی خامنەیی رێبەری ئێران و عەلی لاریجانی ئەمینداری ئەنجومەنی باڵای ئاسایشی نەتەوەیی و ژمارەیەکی زۆری بەرپرسانی سەربازی و ئەمنیی ئێرانی بەدواداهاتووە.

لە بەرامبەردا ئێرانیش هێرشی تۆڵەسەندنەوەی ئەنجامداوە بۆ خاکی ئیسرائیل و دامەزراوە سەربازییەکانی ئەمریکای لە ناوچەکە کردووەتە ئامانج و هێرشی کردووەتە سەر هەموو وڵاتانی دەوروبەری.

ترس لە دووبارەبوونەوەی كارەساتی چێرنۆبڵ هەیە؟