هاتوچۆى گەشتیارى وەستاوە
بۆ یەک رۆژ دەرگا کرایەوە؛ 50 بارهەڵگری “تەڕە” لە پەروێزخانەوە هاتنە کوردستان
964+
وریا فەتاح
دوای پەککەوتنی تەواوەتی جووڵەی بازرگانی و گەشتیاری، کەمێک پێش ئێستا رێگە بە هاتنی نزیکەی 50 بارهەڵگری “تەڕە” (سەوزە و میوە) درا لە مەرزی پەروێزخانەوە بێنە ناو هەرێمی کوردستان.
بەپێى زانیارییەکانى پەیامنێرى 964، ئەم ڕێگەپێدانە تەنیا بۆ ئەمڕۆیە و بۆ ئەو بارانەیە کە لە ناو مەرزەکەدا گیریان خواردبوو.
“لە دیوی ئێرانەوە بە فەرمی بە شۆفێرانی بارهەڵگر وتراوە، تا 1 هەفتەی دیکە نەگەڕێنەوە بۆ مەرزەکە بۆ بارکردن، چونکە جووڵەی بازرگانی راگیراوە”، شۆفێرێک واى بە پەیامنێرى 964 وتووە.
ئەم جووڵە کاتییە لە کاتێکدایە کە بەهۆی ئاڵۆزییەکانی ئێران و لەکارکەوتنی سیستەمی ئەلیکترۆنی لە دیوی ئێران، دەروازە سنوورییەکان بە رووی بازرگانی و گەشتیاریدا داخرابوون، ئەمەش بووە هۆی بەرزبوونەوەی نرخی سەوزە لە بازاڕەکانی هەرێمی کوردستان.
پێداچوونەوە: وریا فەتاح
