وێنەیەک لە کاتی ئەنجامدانی هێرشەکە. فۆتۆ/میدیای بەریتانیا
کوردە چەقۆوەشێنەکەی بەریتانیا شەش ساڵ بەند دەکرێت
964+
هاوبەش ئەبوبەکر
پەنابەرێکی کورد لە بەریتانیا لەسەر هێرشکردنە سەر کەسێک بە چەقۆ، سزای شەش ساڵ زیندانیکردنی بەسەردا سەپێنرا.
ئەو پەنابەرە کوردە ناوی رێباز محەمەدە و تەمەنی 28 ساڵە، لە مانگی کانوونی یەکەمی ساڵی رابردوو لە پارکێکدا لە شاری ساوسامپتۆن بە چەقۆ ھێرشدەکاتە سەر خوێندکارێکی بەریتانی، کە بەر لە ھێرشەکە لەگەڵیدا وەستاوە و قسە دەکەن.
رێباز محەمەد دانی بە تاوانەکەیدا ناوە
میدیای بەریتانیا دوێنێ پێنجشەممە، ڤیدیۆی ئەو پەنابەرە کوردەیان بڵاوکردەوە لەکاتی ئەنجامدانی هێرشەکە و باس لەوە دەکەن، رێباز محەمەد دانی بە تاوانەکەیدا ناوە.
بە وتەی پارێزەری پەنابەرە کوردەکە، رێباز بە بەلەم ھاتووەتە بەریتانیا و دواتر ویستویەتی دیپۆرتی ھەرێمی کوردستان بکرێتەوە، چونکە ھیچ کارێکی نەبووە و بێپارە بووە، بۆ ئەوەش دەبوو تاوانێک ئەنجامبدات.
ئەو دادوەرەی سزاکەی بەسەردا سەپاندووە وتویەتی، ئەو ھاووڵاتییە بیانیانەی دێنە وڵاتەکەوە و تاوان بەرامبەر ھاوڵاتیانی بەریتانی دەکەن سزای یاساییان بەسەردا جێبەجێدەکرێت و لە زووترین دەرفەتدا دیپۆرت دەکرێنەوە.