رووداوەکە لە نێوان کەلار دەربەندیخان روویداوە
لە رێگای چوون بۆ تاقیکردنەوە سەیارەکەی وەرگەڕا بەڵام ئیمتحانەکەی نەفەوتاند
964+
میلاد جەلال – گەرمیان
خوێندکاری زانکۆی سلێمانی لە رێگای چوون بۆ تاقیکردنەوە سەیارەکەی وەرگەڕا، بەڵام ئەوە نەبووە رێگر و سەیارەکەی جێهێشت و خۆی گەیاندە هۆڵی تاقیکردنەوەکە.
جاسم محەمەد بەڕێوەبەری ھاتوچۆی دەربەندیخان بە 964ى وت، “خوێندکارەکە بەیانی ئەمڕۆ سێشەممە 17.2.2026 لە کەلارەوە بەرەوە سلێمانی رۆیشتووە و لەوێ تاقیکردنەوەی ھەبووە، خێرا بووە بۆئەوەی بگاتە تاقیکردنەوەکەی، لە بانیخێڵان دەرچونێکی ھەڵەی ئەنجامداوە و وەرگەڕاوە”.
ئاماژەی بەوەش کرد، کە وەرگەڕاوە خۆی کێشاوە بە ئۆتۆمبێلێکی بارھەڵگریش، شۆفێرەکەی سەلامەتە، کە ھاتۆتە دەرەوە لە ئۆتۆمبێلەکەی، ئۆتۆمبێلێکی دیکەی راگرتووە و بەرەو سلێمانی رۆیشتووە بۆئەوەی فریای تاقیکردنەوەکەی بکەوێت، ئۆتۆمبێلەکەی خۆی بەجێھێشتووە.
