منارەی چۆلی. فۆتۆ: پارێزگای هەولێر
پارێزگای هەولێر بڕیاری دا
دەوامی فەرمانگەکان لە رۆژانی رەمەزان کەم دەبێتەوە
964+
ئەحمەد مستەفا
بڕیاردرا لە مانگی ڕەمەزاندا، دەوامی فەرمی لە سەرجەم دامودەزگاکانی حکوومەت لە سنووری پارێزگای هەولێر بۆ ماوەی یەک کاتژمێر کەم بکرێتەوە و دەوام لە کاتژمێر 9ـی بەیانییەوە دەست پێ بکات.
ئەمڕۆ پێنجشەممە، ئومێد خۆشناو، پارێزگاری هەولێر و جێگری پارێزگار، کۆبوونەوەیەکی تایبەتیان بۆ ئامادەکارییەکان بۆ پێشوازی لە مانگی پیرۆزی رەمەزان کرد، لە کۆبوونەوەکەدا باس لە رەوشی بازاڕ و کۆنترۆڵکردنی نرخەکان کرا و بۆ ئەو مەبەستە 11 بڕیار دران.
پارێزگاری هەولێر جەختی لە توندکردنی چاودێری بازاڕ کردەوە. لیژنەکانی قایمقامیەت، بازرگانی و تەندروستی راسپێردراون کە رێگری لە هەر جۆرە گرانکردنی نرخ و یاریکردن بە بازاڕ بگرن. هەر کەسێک ئەم مانگە بقۆزێتەوە بۆ بەرزکردنەوەی نرخ، رووبەڕووی سزای توندی یاسایی دەبێتەوە.
هەروەها بۆ پاراستنی سەلامەتی هاوڵاتییان، هەڵمەتێکی توند بۆ پشکنینی کۆگاکانی خۆراک و دەرمان و مارکێتەکان دەست پێ دەکات، هاوکات لە بازگەکانەوە چاودێری ورد دەکرێت بۆ ئەوەی ڕێگە بە هاوردەکردنی هیچ کەلوپەلێکی ماوەبەسەرچوو نەدرێت، پارێزگار رایگەیاند: تیمەکانی شارەوانی زیاتر لە رۆژانی ئاسایی کار بۆ ڕێکخستنی بازاڕ و پاککردنەوەی شوێنە گشتییەکان دەکەن.
هێزەکانی ئاسایش، پۆلیس و هاتوچۆ لە شەوانی رەمەزاندا لە ئەرکدا دەبن بۆ پاراستنی ئارامی شار، وە بڕیاردراوە بازاڕی شەوانەی رەمەزان لە سەنتەری شار بە شێوازێکی رێکخراوتر و باشتر لە ساڵانی رابردوو بکرێتەوە، پارێزگای هەولێر باسی لەوەشکرد، لە 10 شەوی کۆتایی مانگی رەمەزاندا، دەرگای مزگەوتەکان تا نوێژی بەیانی کراوە دەبن.
