"ئامادەین خوێنی خۆمان فیدای هەر پارچەیەکی کوردستان بکەین"
رۆژئاوا و باشوور لە یەک سەنگەردا
964+
توانا نەقی – حەسەکە
رەوشی رۆژئاوای کوردستان و ئەو گەمارۆ و هێرشانەی دەکرێتە سەری، جارێکی دیکە گەنجانی پارچەکانی تری کوردستانی لە دەوری یەک کۆکردووەتەوە، بە شێوەیەک ئێستا گەنجانی باشوور و پارچەکانی دیکەی کوردستان لە پاڵ شەڕڤانان ئامادەی قوربانیدانن و ئەوەش ورەی شەڕڤانانی لە سەنگەرەکاندا بۆ بەرزترین ئاست بەرزکردووەتەوە.
شەڕڤانێکی ئاسایشی رۆژئاوای کوردستان لە حەسەکە، بۆ 964 قسەی کرد و وتی، ورەی ئەوان “سەدا سەد” بەرزە و هیچ جۆرە هێرش و گەمارۆیەک ساردیان ناکاتەوە.
ئەو شەڕڤانە دەستخۆشی و سوپاسی تایبەتی ئاڕاستەی خەڵکی باشووری کوردستان و پارچەکانی دیکە کرد، کە لەم بارودۆخەدا هاوسۆز و پاڵپشتی رۆژئاوا بوون، ئاماژە بەوەش دەکات کە پاراستنی خاک ئەرکی هەمووانە و ئەوان لە هەموو شار و گەڕەکێکدا بە ورەیەکی پۆڵایینەوە ئامادەی بەرگریین.
لە لایەکی دیکەوە، گەنجێکی خۆبەخشی باشووری کوردستان کە گەیشتووەتە ناوچەکانی رۆژئاوای کوردستان، لە ناو ئاپۆرایەکی جەماوەری و لەژێر ئاڵای کوردستاندا پەیامی خۆی دەگەیەنێت، ئەو گەنجە بە دەنگێکی بەرز هاوار دەکات و دەڵێت، “ئامادەین خوێنی خۆمان فیدای پارچە پارچەی خاکی کوردستان و رۆژئاوا بکەین.”
ئەم هەڵوێستەی گەنجانی باشوور وەک پەیامێکی بەهێز بۆ دوژمنان دەبینرێت کە سنوورە دەستکردەکان ناتوانن رێگری لە یەکگرتوویی کورد بکەن لە کاتی بەرگری لە خاکدا.
